Vdes hoxha i njohur nga Drenasi
Kryesia e Bashkësisë Islame të Kosovës njofton opinionin e gjerë se në orët e para të mëngjesit të sotëm, në moshën 81-vjeçare, ka ndërruar jetë dijetari e alimi i njohur, njëherësh edhe veteran i letrave islame në gjuhën shqipe dhe zyrtar shumëvjeçar i Kryesisë së BIK-ut, Hajrullah ef. Hoxha.
Hajrullah Hoxha u lind në fshatin Korroticë, të Gllogocit, më 1939. Shkollën fillore e kreu në vendlindje, më pas vazhdoi në Medresenë e Ulët të Prishtinës, ndërsa të mesmen e kreu në “Gazi Husrevbeg”, në Sarajevë.
Në Bashkësinë Islame punoi që nga viti 1964, së pari kreu detyrën e imamit në Deçan, ndërkaq nga viti 1969 ishte imam dhe referent arsimor-fetar në Mitrovicë.
Nga viti 1980, H. Hajrullah Hoxha punoi si nëpunës administrativ në Kryesinë e Shoqatës së Ylemave të Kosovës.
H. Hajrullah Hoxha është njëri ndër themeluesit dhe pishtarët e publicistikës islame në gjuhën shqipe në Kosovë. Veprimtarinë e tij në këtë e fushë e filloi në “Buletin”, për të vazhduar në “Takvim-Kalendar”, “Edukata islame”, “Dituria islame” etj., ku ka botuar trajtesa, përkthime e analiza të ndryshme nga fusha e islamologjisë.
Kontributi më i madh i H. Hajrullah Hoxhës është në “Takvim- Kalendar”, në të cilin, që nga nxjerrja e tij në dritë më 1970, është autor i pjesës kalendarike për trevën e Kosovës. Gjithashtu H. Hajrullah Hoxha ka qenë njohës studiues i mirë i shkencave islame.
Ka njohur mirë historinë islame, e posaçërisht biografinë e Muhamedit a.s. Në revistën, “Edukata Islame”, që nga numri 1 deri në numrin 60-të botoi punimin “Muhamedi a.s. dhe përhapja e fesë islame”.
Varrimi i hoxhës Hajrullah ef. Hoxha, do të bëhet sot, në varrezat e fshatit Korroticë e Epërme, në kohën e namazit të ikindisë.
Po ashtu, njoftohet opinioni se Hajrullah ef. Hoxha ka ndërruar jetë si pasojë e Covidit-19, andaj varrimi i tij do të bëhet vetëm nga rrethi i ngushtë familjar, si dhe nuk do të ketë të pame të organizuar.
