Reçica i kënaqur me punën e fabrikës së Feronikelit në Drenas
Ministri i Punës dhe Mirëqenies Social, Skender Reçica ka vizituar sot fabrikën e Feronikelit në Drenas, ku nga afër ka parë punën që bënë kjo fabrikë, angazhimin e saj në ofrimin e kushteve më të mira të punës, si dhe përmirësimin cilësisë së sigurisë dhe shëndetit në punë, transneton DrenicaOnline.
Kjo vizitë e ministrit Reçica është bërë në përmbyllje të javës Evropiane për Siguri dhe Shëndet në Punë.
Statusi i plotë i ministrit Reçica:
Jeta dhe të drejtat e punëtorëve janë prioriteti ynë!
Javën Evropiane për Siguri dhe Shëndet në Punë, sot e përmbyllëm me vizitën që bëmë në fabrikën “NewCo Ferronikeli”, në Drenas, ku bashkë edhe me kryeinspektorin e Inspektoratit të Punës, Ekrem Kastrati, pamë nga afër punën që bënë kjo fabrikë, angazhimin e saj në ofrimin e kushteve më të mira të punës, si dhe përmirësimin cilësisë së sigurisë dhe shëndetit në punë.
Jam i kënaqur që kjo fabrikë, edhe përkundër situatës aktuale me pandeminë, në asnjë moment nuk është ndalur në mënyrë që mbi 800 punëtorët e saj të kenë kujdes të shtuar në aspektin e sigurisë dhe shëndetit në punë.
Ne çdo ditë do të vazhdojmë të jemi pranë punëtorëve dhe punëdhënësve, për t’i mbështetur ata, gjithnjë konform legjislacionit në fuqi. Qëllimi i inspektorëve tanë asnjëherë nuk është gjobitja e punëdhënësve, por ngritja e vetëdijesimit dhe respektimit të legjislacionit me qëllim të përmirësimit të kushteve të punëtorëve, sigurisë dhe shëndetit të tyre në vendin e punës.
Jeta dhe të drejtat e punëtorëve janë prioritet i imi dhe dikasterit që drejtoj, andaj në asnjë rast nuk do të heshtim dhe do të jemi të pa kompromis ndaj gjithë atyre që nuk respektojnë masat e sigurisë dhe shëndetit në punë.
