Lladrovci: Vëllezër, gëzuar bashkimi në një Listë zgjedhore në Mal të Zi!
I pari i Komunës së Drenasit, Ramiz Lladrovci përmes një statusi në facebook ka bërë thirrje që shqiptarët të rrijnë të bashkuar dhe ta bëjnë një listë të përbashkët zgjedhore në Mal të Zi.
Postimi i plotë i Lladrovcit:
Uniteti nacional, ka qenë dhe mbetet brengë e secilit shqiptar largpamës, aq më shumë, në politikë, kur duhet edhe guxim, edhe vullnet edhe rast për të tejkaluar interesat personale.
Lista e përbashkët për zgjedhjet e 30 Gushtit e arritur nga forcat politike shqiptare, shoqatat, atdhetarët dhe intelektualët në Malin e Zi, ishte lajm shumë inkurajues. Aq më shumë, për neve që nuk jetojmë aty, e në veçanti për diasporën tonë.
Ky unitet, do përgëzuar sot e gjithmonë, sepse, bashkimi, gjatë tërë historisë tonë, ka prodhuar efekte pozitive, efekte të mira dhe historia i ka shënuar dhe shpërblyer me kujtesë, raste të cilat na kanë bërë krenar, ashtu siç i kishim rastet para disa decenieve e këndej.
Sot, e gjithmonë, shqiptarët në Mal të Zi, duhet të jenë krenar me të kaluarën dhe të tashmen e vet, për të nesërmen e fëmijëve, nipave e stërnipave të vet, andaj, uniteti duhet të jetë kryefjala, sot e këtu.
Ulqini, kjo mbretëreshë e Mesdheut ndër shekuj, Tivari i legjendave, Shpuza, Kraja e tërë Malësia heroike, Ana e Malit, Rozhaja dhe Plava, Gucia e Ali Pashës, duhet të jenë gjithmonë bashkë, në çdo kohë dhe çdo rrethanë, nga Buna deri në Dacaj.
Kosova e ka ndjerë ndër shekuj praninë e frymës së shqiptarëve nga kjo anë, ka ndjerë vuajtjen dhe përndjekjen, shkrumbin mbi Ulqin, të shpërnguljes e shpopullimit, të dhunës dhe shkombëtarizimit, por, kishte besim se qëndresa heroike, do të mbisundojë dhe paqja do të vije.
Kosova ka ndjerë trimërinë e bijve dhe bijave të këtyre trojeve, nga koha kur historia bëhej me shpatë, nga viti 1878, 1881, 1912, 1981, 1989, 1998-1999. Ka ndjerë frymën e dijes, guximit dhe besimin e armatës së shkollarëve, dijetarëve dhe akademikëve që kanë ngritur interesin nacional dhe të Kosovës në nivele meritore, andaj, çdo patriot, e bashkë ndjenë këtë bashkim dhe unitet të partive politike shqiptare.
Vëllezër e motra në Malin e Zi,
Bashkimi ka sjellë rezultate historike në Tuz, në Luginën e Preshevës, në Bujanoc, në Maqedoninë e Veriut, andaj, do të sjell rezultate edhe në Malin e Zi. Dua të shpreh respektin e thellë, për të gjithë miqtë e mi që i kontribuuan këtij bashkimi.
Bashkimi Juaj, do të jetë lajm i mirë se shqiptarët, përherë në të gjitha trojet ku jetojnë, të jenë të bashkuar, jo vetëm në një listë, por edhe nën një flamur, flamurit tonë, kuq e zi.
Dua të shpreh respektin tim të thellë, për miqtë e mi liderë të partive politike që iu bashkuan Listës së përbashkët, liderët e institucioneve, të gjithë ata që iu gjenden Kosovës pranë, kur e kishim më së vështiri, që e jetuan dhe bashkëndjen edhe tmerrin e luftës, edhe gëzimin e fitores së Ushtrisë Çlirimtare të Kosovës.
Në veçanti, ndjehem krenar për kontributin e jashtëzakonshëm të diasporës shqiptare, miqtë e mi në vendin nga lindi dielli ynë, Amerika, diaspora jonë me origjinë nga Mali i Zi e cila ishte shembullore dhe vijës besnike të Dedë Gjo Lulit dhe trimave të Deçiqit.
Krenar me unitetin e dëshmuar tashmë dhe Listës shqiptare që e përbëjnë Alternativa shqiptare, Forca e Re Demokratike, Lidhja Demokratike Shqiptare, Lëvizja qytetare Perspektiva dhe Unioni i Tuzit. Përgëzime, miq, vëllezër.
Ju na bëtë krenar, ju lumtë Nik Gjeloshaj, Nazif Cungu, Nikollë Camaj, Fadil Kajoshaj dhe Amir Hollaj. Interesi nacional është më i madh e më i rëndësishëm se interesi i një partie apo një lëvizjeje qytetare.
Shqiptarë në Malin e Zi, votoni Listën e bashkimit të shqiptarëve, votoni si kurrë më parë për unitet. Unitetin e bën secila votë, kudo ndodhet, pavarësisht bindjeve, sepse, më mirë se shqiptari askush nuk e prezanton vullnetin Tuaj.
Nga zemra, ju uroj suksese.
Vëllezër, gëzuar bashkimi në një Listë zgjedhore në Mal të Zi!
