Vdes nga coronavirusi veterania e arsimit nga Drenasi, Hajrie Rrecaj
Ka vdekur të dielën veterania e arsimit nga fshati Zabel i Ulët i Komunës së Drenasit, Hajrie Rrecaj.
E ndjera ishte e infektuar me COVID-19.
Hajrie Rrecaj për herë të parë mori ditarin në dorë në vitin 1977, në shkollën fillore Emin Duraku komuna e Orllatit.
Pas tri vitesh filloi punën në Drenas dhe punoi 15 vite me radhë, si mësuese e mësimit klasor.
Në komunën e Prishtinës filloi punën në vitet e 90-ta në shkollën Asim Vokshi deri në mbarimin e luftës dhe pastaj e vazhdoi punën në shkollën tonë Faik Konica.
Mësuesja Hajrije përgjatë këtyre viteve la gjurmë të thella në arsim.
Përcolli gjenerata te shumta duke punuar me përkushtimin më të madh në edukimin e brezave të rinj!
“Emrin e saj do ta kujtojmë me mall për bujarinë, fisnikërinë dhe çiltërsinë që reflektonte në mesin tonë”, thuhet në njoftim.
Telegrafi, më herët i kishte kushtuar një storie veteranes së arsimit Hajrie Rrecaj.
Mësueses Hajrije i kishte mbetur vetëm edhe një vit deri në përfundimin e misionit të saj, për të edukuar, mësuar e aftësuar plot 43 gjenerata nxënësish, të cilëve u mësoi shkrim e lexim, dhe për të cilët dha gjithë kontributin e saj, që të arrijnë majat e suksesit.
