Presidenti sot takon liderët e partive politike, gati qeveria e re
Presidenti i Republikës së Kosovës sot pasdite do t’i takojë liderët e partive politike parlamentare për të gjetur rrugën drejt formimit të qeverisë së re.
Burimet e IndeksOnline kanë thënë se liderët janë njoftuar për takimin që do të ndodhë pasdite, ndërsa në të do të flitet për hapat e mëtutjeshëm drejt formimit të ekzekutivit, pa Lëvizjen Vetëvendosje.
Ndryshe sot Thaçi i ka shkruar edhe letrën e tij të pesë, liderit të VV-së Albin Kurti me anë të së cilës e ka njoftuar atë që nuk e ka shfrytëzuar të drejtën e tij të propozimit të kandidatit të ri për ta formuar Qeverinë e re.
Thaçi ka njoftuar Kurtin se tashmë do të bëjë një konsultim të përbashkët me liderët e partive politike parlamentare për hapat e mëtejmë që do të ndërmerren, në pajtueshmëri me Kushtetutën e Kosovës.
Në këtë letër, Thaçi i rikujton Kurtit se në pajtim me mandatin kushtetues të Presidentit të Republikës së Kosovës është përgjegjësi e tij ta ruajë stabilitetin e vendit dhe ta garantojë funksionimin demokratik të institucioneve të Kosovës.
