Veseli e Lladrovci vizitojnë pyjet dhe xhaminë që u dogjën në fshatrat e Drenasit
Kryetari i Komunës së Drenasit Ramiz Lladrovci ka pritur në takim kryetarin e Partisë Demokratike të Kosovës, Kadri Veselin me të cilin kanë vizituar xhaminë e djegur në fshatin Vërboc, vatrën e djegur mbrëmë të pyjeve në Abri, Tërdec e Baicë si dhe fermerin Mensur Gllareva.
Kryetari Lladrovci e ka njoftuar kryetarin Veseli për të gjitha masat që ka ndërmarrë komuna për luftimin dhe parandalimin e përhapjes së virusit COVID-19, për bashkëpunimin e gjithanshëm dhe angazhimin për zvogëlimin e dëmeve nga pandemia.
Kryetari LLadrovci dhe kryetari Veseli kanë vizituar edhe xhaminë e djegur në fshatin Vërboc, ku në vendin e ngjarjes janë pritur nga kryetari i Bashkësisë Islami të Drenasit, Valon Bequku, kryemami i Bashkësisë Islame në Drenas, Mehdi Kastratin dhe imamin e Xhamisë në Vërboc, Driton Kastrati.
Djegien e xhamisë në fshatin Vërvoc, kryetari Lladrovci e ka quajtur akt të shëmtuar e kriminal, ku djegia e monumentit më të vjetër fetar, ka zgjuar indinjatën e të gjithë banorëve të komunës dhe më gjerë.
Edhe kryetari i PDK-së, Kadri Veseli e ka dënuar këtë akti dhe ka shtuar se institucionet duhet të gjejnë mundësi për të riparuar këtë tempull fetar ashtu siç e meriton, sepse ky objekt nuk ka qenë vetëm shtëpi e Zotit dhe besimtarëve, por dikur ka qenë edhe vatër e strehimit e rezistencës së luftës së fundit ku qindra banorë të kësaj ane kanë qëndruar në të.
Më pas, kryetari Lladrovci dhe kryetari Veseli, për të parë nga afër punën e fermerëve të Drenasit, kanë vizituar fermën e Mensur Gllarevës, ku për së afërmi kanë dëgjuar për sfidat me të cilat përballet ferma e tij në këtë kohë pandemie si dhe mundësia e përkrahjes së kompanive private pas pandemisë.
Po ashtu ata kanë qëndruar edhe në vendin ku janë djegur dhjetëra hektarë me pyje në Abri, Tërdec e Baicë dhe kanë ftuar qytetarët të mos ndezin zjarre në natyrë. “Katastrofa natyrore e djegies së pyjeve e cila po ndodhë javëve të fundit në komunën tonë, është e rëndë sepse po ndodh në kohën e kufizimit të lëvizjes së qytetarëve dhe mbingarkimit të zjarrfikësve për shuarjen e tyre. Djegia e pyjeve është e dënueshme”, ka thënë kryetari Lladrovci.
