Deputetja e PDK-së: Kryeministër edhe veriu është pjesë e Kosovës, atje po zbatohen masat e Serbisë
Deputetja e PDK-së, Ariana Musliu-Shoshi, ka bërë të ditur se në pjesën veriore të Mitrovicës janë duke u zbatuar masat e qeverisë serbe dhe jo të Kosovës.
Deputetja e Kuvendit të Kosovës nga radhët e Partisë Demokratike të Kosovës, Ariana Musliu-Shoshi, përmes një postimi në profilin e saj zyrtar në rrjetin social Facebook, ka bërë të ditur se në pjesën veriore të Mitrovicës janë duke u zbatuar masat mbrojtëse ndaj pandemisë COVID-19 të cilat i ka vendosur Qeveria e Serbisë dhe jo masat që ka vendosur Qeveria e Kosovës.
Sipas Musliu-Shoshit, me këtë veprim, po rrezikohet edhe jeta e qytetarëve të tjerë shqiptarë që jetojnë në veri të Mitrovicës.
“Kryeministri Kurti, nuk e tha asnjë fjalë të vetme e nuk ndërmori asnjë veprim institucional në funksion të respektimit të masave të cilat i ka vendosur qeveria, të cilat vlejnë për gjithë territorin e Kosovës. Kryeministër, edhe në atë pjesë të Kosovës ke qytetarë që vuajnë dhe presin ndihmë nga Ju!”, ka shkruar ndër të tjera deputetja Musliu-Shoshi.
Postimi i plotë i deputetes Musliu-Shoshi, pa ndërhyrje:
Shtrohet pyetja: A është duke u respektuar vendimi i Qeverisë së Kosovës për shpalljen e emergjencës për shëndetin publik në tërë territorin e Republikës së Kosovës?
Sot në veri të Mitrovicës janë duke u zbatuar masat e Serbisë për mbrojtje ndaj pandemisë COVID-19 dhe është ndaluar lëvizja e lirë e banorëve për shkak të vendosjes së gjendjes së jashtëzakonshme të shpallur nga shteti i Serbisë.
Kryeministri Kurti, nuk e tha asnjë fjalë të vetme e nuk ndërmorri asnjë veprim institucional në funksion të respektimit të masave të cilat i ka vendosur qeveria, të cilat vlejnë për gjithë territorin e Kosovës.
Kryeministër, edhe në atë pjesë të Kosovës ke qytetarë që vuajnë dhe presin ndihmë nga Ju!.
