E merr guximin: Faton Hasani shpall kandidaturën për kryetar të PDK

Faton Hasani ka njoftuar kandidaturën për kryetar të Partisë Demokratike të Kosovës (PDK), duke theksuar nevojën për bashkim të brendshëm, reforma dhe rikthim të besimit të qytetarëve.Përmes një deklarate publike, Hasani ka bërë të ditur se vendimi për të hyrë në garën për drejtimin e PDK-së vjen pas kërkesave dhe mbështetjes që, sipas tij, ka marrë gjatë dy muajve të fundit nga aktivistë, anëtarë dhe përfaqësues të degëve të ndryshme të partisë.

Hasani ka theksuar se është pjesë e PDK-së që nga themelimi i saj, ndërsa ka deklaruar se gjatë angazhimit të tij politik nuk e ka parë partinë si mundësi për përfitime personale apo avancim në pozita publike.Në deklaratën e tij, Hasani ka falënderuar ish-presidentin Hashim Thaçi dhe ish-kryetarin e PDK-së, Kadri Veseli, për besimin dhe vlerësimin që, sipas tij, kanë treguar ndaj tij ndër vite.
Postimi:DEKLARATË PUBLIKE

Përkushtimi im ndaj PDK-së dhe kandidimi për Kryetar të Partisë Demokratike të KosovësTë dashur miq, anëtarë dhe aktivistë të Partisë Demokratike të Kosovës,
Të nderuara struktura drejtuese të PDK-së,

Të dashur qytetarë,

Pjesë e Partisë Demokratike të Kosovës kam qenë që nga themelimi i saj. Gjatë gjithë kësaj periudhe, kam dhënë kontributin tim me bindjen e palëkundur se angazhimi politik duhet të ketë një qëllim të vetëm: të mirën e vendit tonë dhe të qytetarëve tanë.Gjatë rrugëtimit tim politik, asnjëherë nuk e kam parë partinë si mundësi për përfitime personale, privilegje apo karrierë individuale. Nuk kam kërkuar pozita drejtuese në strukturat e partisë dhe as poste në institucionet shtetërore. Për mua, përkushtimi ndaj një ideali nuk matet me pozitën që mban, por me kontributin që jep dhe me parimet që ruan.

Në këtë rrugëtim, kam pasur nderin dhe vlerësimin e ish-presidentit Hashim Thaçi dhe ish-kryetarit të PDK-së, Kadri Veseli, të cilët më kanë ofruar mundësinë të jem pjesë e strukturave udhëheqëse të partisë, si dhe të marr përgjegjësi në dikastere të Qeverisë gjatë kohës kur PDK-ja ishte në pushtet.I falënderoj të dy për besimin dhe vlerësimin që kanë treguar ndaj meje. Megjithatë, unë kam zgjedhur rrugën time, duke u dhënë përparësi të tjerëve dhe duke mos hyrë asnjëherë në garën e interesave personale apo në atë që shpesh njihet si politika e bërrylave.

Pavarësisht ofertave dhe mundësive që më janë paraqitur, kam refuzuar marrjen e posteve qeveritare. Për më shumë se dy dekada, jam përqendruar në punën time në biznesin privat familjar, duke ruajtur pavarësinë time ekonomike dhe politike.Gjatë gjithë kësaj kohe, nuk kam përfituar asnjëherë nga ndonjë tender apo privilegj partiak. Për këtë jam krenar, sepse besoj se integriteti personal, ndershmëria dhe pavarësia janë vlera mbi të cilat duhet të ndërtohet çdo përgjegjësi publike.
Pse vendosa të hyj në këtë garë?Gjatë dy muajve të fundit, jam kontaktuar nga shumë aktivistë, anëtarë dhe përfaqësues të strukturave lokale të degëve të ndryshme të PDK-së. Ata më kanë shprehur besimin dhe bindjen se përvoja ime, pavarësia ime dhe përkushtimi im mund t’i shërbejnë partisë në këtë moment delikat.

I kam dëgjuar me vëmendje këto kërkesa. I kam analizuar me përgjegjësi dhe kam reflektuar gjatë mbi gjendjen në të cilën ndodhet subjekti ynë politik, sfidat me të cilat përballet vendi dhe pritshmëritë e qytetarëve tanë.Kam ardhur në përfundimin se në momente të tilla nuk mjafton të qëndrojmë anash, të japim mendime apo të presim që përgjegjësinë ta marrë dikush tjetër. Kur partia dhe vendi kanë nevojë për angazhim, përkushtim dhe përgjegjësi, secili prej nesh duhet të jetë i gatshëm të japë atë që mundet.

Prandaj, pas një reflektimi të kujdesshëm dhe duke marrë parasysh kërkesat dhe mbështetjen që më është shprehur nga shumë degë të PDK-së, ju njoftoj se kam vendosur të hyj në garën për Kryetar të Partisë Demokratike të Kosovës.Hyj në këtë garë me respekt të plotë për të gjithë kandidatët e tjerë që i plotësojnë kriteret dhe që kanë të drejtën e tyre legjitime për të garuar. Kjo garë duhet të jetë një mundësi për debat, ide, vizion dhe bashkim, e jo një arsye për përçarje.

PDK-së i duhet një kapitull i riBesoj se PDK-ja ka nevojë për një frymë të re bashkëpunimi, për një kulturë të përgjegjësisë dhe për një lidership që i bashkon njerëzit rreth vlerave, jo rreth interesave personale.
Na duhet një parti ku anëtarët ndihen të vlerësuar, aktivistët ndihen të respektuar, profesionistët gjejnë hapësirë për kontribut dhe të rinjtë shohin një të ardhme brenda saj.Na duhet një PDK që ruan trashëgiminë dhe kontributin e saj historik, që reflekton mbi gabimet, që i përmirëson dobësitë dhe që rikthen besimin e qytetarëve përmes punës, integritetit dhe përgjegjësisë.
Nuk hyj në këtë garë për të kërkuar një privilegj personal. Hyj sepse besoj se është koha që përvoja, pavarësia, ndershmëria dhe vullneti për të shërbyer të vihen në funksion të një qëllimi më të madh.Nuk më motivon pozita, por përgjegjësia. Nuk më udhëheqin interesat personale, por interesi i partisë dhe i vendit. Nuk kërkoj privilegj, por besimin për të shërbyer.

Ftoj të gjithë anëtarët, aktivistët, strukturat e PDK-së dhe qytetarët që këtë garë ta shohin si një mundësi për reflektim, bashkim dhe hapje të një kapitulli të ri.PDK-ja ka potencial, ka njerëz të përkushtuar dhe ka një histori që meriton të shndërrohet në forcë për të ardhmen. Është përgjegjësia jonë që këtë potencial ta kthejmë në besim, këtë histori në vizion dhe këtë përkushtim në rezultate konkrete për qytetarët.

Me respekt për të kaluarën, me përgjegjësi për të tashmen dhe me besim në të ardhmen, jam i gatshëm të marrë këtë përgjegjësi.Për një PDK më të bashkuar, më të hapur, më të fortë dhe më afër qytetarit!

Për një Kosovë me më shumë drejtësi, zhvillim dhe mundësi për të gjithë!VIZIONI IM PËR PDK-NË – BASHKIM, REFORMIM DHE PËRGJEGJËSI

Kandidimi im nuk është thjesht një garë për të marrë drejtimin e një partie politike. Është një zotim për të punuar që PDK-ja të rikthejë fuqinë e saj politike, besimin e qytetarëve dhe rolin e saj në zhvillimin e shtetit të Kosovës.Nëse më besohet kjo përgjegjësi, angazhimi im do të përqendrohet në disa prioritete themelore:

1. Bashkimi i partisë dhe tejkalimi i ndasive. PDK-ja duhet të jetë shtëpi e përbashkët për të gjithë anëtarët dhe aktivistët e saj. Askush nuk duhet të ndihet i përjashtuar për shkak të qëndrimeve, bindjeve apo përkatësisë në grupe të ndryshme brenda partisë.2. Demokraci e brendshme dhe meritokraci. Pozitat dhe përgjegjësitë duhet të fitohen përmes meritës, integritetit, punës dhe besimit të anëtarësisë, jo përmes afërsisë personale apo interesave të ngushta. Çdo aktivist që ka kontribuar me ndershmëri duhet të ketë mundësi të barabarta për të ecur përpara.

3. Hapje ndaj gjeneratës së re dhe profesionistëve. PDK-ja duhet t’u japë hapësirë të rinjve, ekspertëve, sipërmarrësve dhe njerëzve me integritet, duke bashkuar përvojën e brezave me energjinë dhe idetë e reja.4. Rikthimi i besimit të qytetarëve. Partia duhet të dëgjojë më shumë, të premtojë me përgjegjësi dhe të veprojë me transparencë. Besimi nuk fitohet vetëm gjatë fushatave zgjedhore, por përmes punës së përditshme dhe rezultateve konkrete për qytetarët.

5. Një PDK e pavarur nga interesat personale. Partia duhet të jetë në shërbim të qytetarëve dhe të shtetit, jo instrument për privilegje individuale. Integriteti, llogaridhënia dhe respektimi i interesit publik duhet të jenë parime të panegociueshme të lidershipit të saj.6. Një vizion i qartë për Kosovën. PDK-ja duhet të ofrojë zgjidhje konkrete për zhvillimin ekonomik, punësimin, arsimin, shëndetësinë, sundimin e ligjit dhe forcimin e aleancave strategjike të Kosovës.

Unë besoj se PDK-ja nuk ka nevojë vetëm për ndryshim të emrave në krye të saj. Ajo ka nevojë për një mënyrë më të mirë të organizimit, të vendimmarrjes dhe të komunikimit me qytetarët. Ka nevojë për një lidership që bashkon, dëgjon, merr përgjegjësi dhe jep llogari.Nuk premtoj mrekulli dhe nuk pretendoj se sfidat mund të zgjidhen brenda natës. Premtoj angazhim, seriozitet, ndershmëri dhe gatishmëri për të punuar me të gjithë ata që e vendosin interesin e partisë dhe të Kosovës mbi interesin personal.
PDK-ja është më e madhe se secili prej nesh. E ardhmja e saj nuk duhet të përcaktohet nga interesat e individëve, por nga vullneti i anëtarësisë, cilësia e ideve dhe besimi i qytetarëve.Është koha të bashkohemi rreth vlerave, të garojmë me dinjitet dhe të ndërtojmë një të ardhme që na bën krenarë të gjithëve.

Bashkë për një PDK të bashkuar. Bashkë për një PDK që reformohet. Bashkë për një Kosovë më të fortë!

Shpërndaje këtë lajm në: