Hajnat futen në shtëpinë e mërgimtarit në Drenas, vjedhin mjete të punës dhe një armë
![](https://drenicaonline.com/wp-content/uploads/2023/11/policia-lajm-i-fundit-aksident-750x430.jpg)
Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. E cak i hajnave shpeshherë janë edhe shtëpitë e mërgimtarëve, të cilat në Kosovë mbesin të mbyllura në shumicën e muajve të vitit, raporton Gazeta Sinjali.
Kështu ka ndodhur edhe në shtëpinë e familjes Dervishi nga Drenasi, pronari i të cilës jeton jashtë vendit. Shtëpia e tyre u thye nga hajnat.
Sinjali mëson se rasti u zbulua pasi personi që kujdeset për shtëpinë e njoftoi Policinë e Kosovës.
Burimet brenda Prokurorisë kanë bërë me dije se hajnat kanë avulluar mjete pune dhe një armë, duke shkaktuar dëme rreth 1 mijë euro.
Njësitë policore kanë kryer në vendin e ngjarjes të gjitha ekzaminimet që ndihmojnë në zbardhjen e rrethanave të rastit dhe çojnë në identifikimin e personave të dyshuar.
Me urdhër të prokurorit, rasti është cilësuar ‘Vjedhje e rëndë’, teksa vazhdojnë hetimet për gjetjen e të dyshuarve dhe arrestimin e tyre.