Bekim Jashari i strehon dy pensionistët e Prekazit që KEDS-i i ka lënë pa rrymë
Kryetari i Komunës së Skenderajt, Bekim Jashari, ka vizituar sot familjen Maliqi nga Prekazi i Epërm, të cilit KEDS-i ia kishte ndërprerë energjinë elektrike tash e 6 ditë si pasojë e një borxhi.
Pas kësaj vizite Kryetari Jashari, i ka bindur ata të vendosen në shtëpinë e personave të moshuar në Skenderaj.
“U garantova po ashtu që sa herë të dëshirojnë do t’ua mundësojmë që të vizitojnë shtëpinë e tyre, të afërmit dhe të shëtisin në qytetin tonë”, tha Jashari.
Jashari, tutje tha se duke marrë parasysh gjendjen e tyre shëndetësore, pamundësinë e përkujdesjes për njëri-tjetrin, kushtet jo të mira të banimit dhe nevojën e përkujdesjes së tyre nga të tjerët me ushqim, hixhienë dhe trajtim mjekësor, kërkoi nga ta që të pranojnë të bëhen rezident në SHPMPF, ani pse kapaciteti për të pranuar rezident të ri është i vogël por që për këtë rast me gjendje të tillë morën vendimin e duhur në kohë të shpejtë pa pritur fare.
“Së pari shkuam së bashku dhe pamë nga afër kushtet e akomodimit, ushqimit dhe trajtimit mjekësor dhe u garantova që të gjitha shërbimet do t’i kenë falas, pa pasur nevojë që të shpenzojnë pensionet që ata marrin. U garantova po ashtu që sa herë të dëshirojnë do t’ua mundësojmë që të vizitojnë shtëpinë e tyre, të afërmit dhe të shëtisin në qytetin tonë”, tha Jashari.
Kryetari Jashari, u shpreh jashtëzakonisht i lumtur që nga sot Baca Mursel dhe gruaja e tij Rahimja do të vazhdojnë jetën e tyre pa brenga e telashe, në shtëpinë e tyre të re.
