Këngëtarja Era Istrefi është e nominuar për çmimin EBBA Aërds një çmim që jepet për artistët që arrin të thyejnë kufijtë me muzikën e tyre
Viti 2016 mund të konsiderohet si viti më i suksesshëm për këngëtaren Era Istrefi.
Kënga e saj “Bon Bon” është duke shkuar drejt 300 milionë klikimeve në youtube, derisa këngëtarja ka thyer kufijtë me këtë paraqitje të saj, duke u bërë këngëtarja e vetme shqiptare e cila ka arritur që të siguroi kontratë me Sony Music.
Ceremonia e ndarjes së çmimeve do të zhvillohet më 11 janar 2017 në Groningen, si pjesë e Eurosonic Noorderslagfestival.
Vlen të përmendim faktin se Era është fituesja e dhjetë e European Border Breaker Awards, 2017, një çmim europian muzikor për artistët e rinj.
Çdo vit 10 artistë europianë marrin çmimin EBBA për të njohur suksesin e tyre në vende të tjera, përveç vendit të tyre. Suksesi përfshin transmetimet, shitjet, performancat live në Europë dhe pozicionin në European Border Breakers Charts.
Publiku ka mundësinë të votojë për të preferuarin deri më datën 23 dhjetor.
Por shumë fansa kanë pyetur se pse Era nuk prezanton Kosovën në këtë ngjarje.
Burime të Gazetës Express thonë se arsyeja është se Kosova ende nuk është e njohur si shtet nga The European Music Awards for Emerging Artists, një agjenci kjo që bashkëfinacohet nga Creative Europe që financohet nga Bashkimi Europian.
Gjithashtu, Express merr vesh se Era ka pasur mundësi që për këtë çmim ta prezantonte edhe ndonjë shtet tjetër Europian, që ja kishte bërë të mundur që ajo më lehtë të jetë si e preferuara e shteteve të tjera Europiane, por ajo ka zgjedhur Shqipërinë.
Ende nuk dihet se edhe Dua Lipa e ka pasur mundësinë apo ka kërkuar që të hynte në këtë garë si Kosovë, por i është dashur të zgjedh Britaninë e Madhe, nënshtetësinë e të cilit shtet e gëzon.
Për dallim nga sporti, që ka gjetur mundësinë për t’u anëtarësuar nëpër organizata sportive europiane, këtë nuk e kanë bërë agjencitë e ndryshme artistike të Kosovës, që nuk dihet a e kanë kërkuar anëtarësimin në këto agjenci.
Kosova nuk ka të drejtë pjesëmarrje as në Eurovision, që organizohet nga Unioni i Transmetuesve Europian.
Ndryshe, për Era Istrefi që përfaqëson Shqipërinë në këtë garë por edhe për Dua Lipën mund të votoni në linkunhttps://www.europeanborderbreakersawards.eu/en/vote/, duke përzgjedhur tre artistë që preferoni /GazetaExpress/
