Shqiptarët nëpër Evropë po tregohen të suksesshëm thuajse në të gjitha sferat e jetës.
Por një tjetër Shaqiri ka filluar furishëm me suksese në Zvicër, vendi i mundësive për shqiptarët.
Ari Shaqiri, është vëllai i madh i Xherdanit i cili ka filluar të merret me fëmijë dhe ka hapur një akademi të futbollit që e quan ‘Prio Soccer’, që në shqip do të thotë ‘Prioritet futbolli’.
Akademia është hapur tre muaj më parë dhe deri më tani po ka mjaft sukses, pasi në të janë mbi 50 futbollistë.
Në një prononcim për Telegrafin, krijuesi i akademisë ‘Prio Soccer’, Ari Shaqiri tregon për përvojën e tij në këtë drejtim.
“Është një projekt shumë i madh dhe ka filluar me mjaftë sukses në Zvicër fillimisht. Ka tre muaj që është hapur akademia dhe deri më tani kemi mbi 50 futbollistë të regjistruar”, shprehet Ari Shaqiri për Telegrafin.
Në këtë akademi ka futbollistë të talentuar nga të gjitha nacionalitet, por një numër i madh është edhe i shqiptarëve.
Ari tregon se ka shumë talent në këtë akademi dhe beson se një ditë këta futbollistë të rinj mund të bartin fanellën e ndonjë skuadre të madhe evropiane.
“Ka shumë futbollist të talentuar edhe nga Kosova dhe Shqipëria kemi nxënës të cilët premtojnë shumë për të ardhmen”, deklaroi Shaqiri.
Përpos Ari Shaqirit, në këtë akademi janë edhe disa trajnerë profesionist të cilët më parë kanë luajtur edhe për Përfaqësuesen e Zvicrës e skuadra të mëdha zvicerane si Grasshopper apo Zurich.
Stefan Kohler është trajneri kryesor në akademi që më parë ka qenë i rregullt tek Përfaqësuesja e Zvicrës nga mosha U15 deri në U21, ndërsa pas tij vijnë edhe Simon Dunk ish futbollist i Baselit, Kimran Kurtish dhe Fabio Welbers.
Shaqiri ka në plan që këtë akademi ta sjellë edhe në Kosovë për t’i ndihmuar fëmijët kosovar ta tregojnë talentin dhe t’i dërgoj në skuadrat e mëdha evropiane.
“Qëllimi është që këtë akademi ta hap edhe në Kosovë. Jemi duke shqyrtuar mundësinë se në cilin qytet ta hapim. Ne synojmë që t’i ndihmojmë fëmijët kosovar dhe në momentin që do të hapet akademia atëherë përpos që do të angazhojmë trajnerë vendor do të sjellim edhe profesionist nga Zvicra”, deklaroi Shaqiri.
Por para Xherdanit, ishte Ari ai që ka luajtur në gjigantin zviceran Basel, ku ishte së bashku me yllin e sotëm të Barcelonës, Ivan Rakitic dhe portierin e Kombëtares së Zvicrës, Yann Sommer.
Ari Shaqiri gjatë një aksioni sa ishte pjesë e Baselit, ndërsa mbrapa tij shihet ylli i tanishëm i Barcelonës, Ivan Rakitic
Ari Shaqiri gjatë një aksioni sa ishte pjesë e Baselit, ndërsa mbrapa tij shihet ylli i tanishëm i Barcelonës, Ivan Rakitic
Qëllimi i Arit është që t’i ndihmojë një ditë fëmijët kosovar dhe për këtë ka vendosur që në të ardhmen këtë akademi ta hap në Kosovë pa përfituar ndonjë gjë.
Për të parë më shumë material nga akademia ‘Prio Soccer’, mundeni të futeni edhe në faqen zyrtare www.priosoccer.com.
