Vrasja në Gradicë/ Gjithçka çfarë ndodhi në seancën e sotme gjyqësore

Në shqyrtimin e së hënës në Gjykatën Themelore në Prishtinë, pala e dëmtuar Selvete Muja deklaroi se njëri nga të akuzuarit Amir Bardhi, ka qenë në të njëjtën klasë me vajzën e saj Albuleta Muja dhe Driton Mujën në shkollën fillore.

“Xhaferin unë nuk e kam njoftë kurrë, për herë të parë këtu në gjyq e kam pa, ndërsa me Amirin, çika ime Albuleta dhe Dritoni janë kon bashkë me një klasë, në shkollë fillore po edhe kur janë shku në shkollë të mesme janë taku. Amiri, u kon punëtor te kunati i madh Sokoli, mirëpo ka pas raste kur e merrte edhe B.M. Me ni sofër, me rob tonë ka hongër e ka pi. Kurrë diçka të keqe prej tyre nuk kemi pas”, deklaroi e dëmtuar Muja.

Gjithashtu, e dëmtuara shtoi se tani i ndjeri B.M ishte njeri i mirë dhe human, si dhe nuk ka pasur mosmarrëveshje apo ngatërresa me ndonjë njeri tjetër, raporton “Betimi për Drejtësi“.

E pyetur nga prokurori Bashkim Zeqaj se me kë ka shkuar i ndjeri B.M në mal, e njëjta u deklarua se i ndjeri ishte nisur nga shtëpia me djalin e saj, të ndjerin si dhe me Driton Mujën, ku rrugës e kishin marrë tek xhamia edhe Valmir Mujën dhe vëllanë tjetër të Dritonit, Vladrin Mujën.

“Ne e kemi ditë se është në mal pas me thanë 30/40 minuta, na e kena kuptu se i ka nxanë rami me dru, të djalin A.M dhe B.M. S’kena menu se do të ndodhë kjo pasi që s’jena kanë keq me kërkon. Pasi që ka ndodhë ngjarja. në mal me kunatin e madh, çikën, çikën e Sokolit dhe me djalin e kunatit të vogël, ne të pestë jemi shku në vendin e ngjarjes”, shtoi ajo. (LAJMI VIJON POSHTË REKLAMAVE👇)

Po ashtu, e njëjta theksoi që gjatë rrugës për në vendin e ngjarjes ishin takuar me familjarët e të akuzuarit Xhafer, të cilët i kishin kërkuar ndihmë për arsye se fillimisht ata kanë menduar se B.M dhe A.M i kishin zënë drunjtë.

Tutje e dëmtuara deklaroi se bashkëshorti i saj kishte qenë pjesëtar i UÇK-së, dhe po ashtu ishte i plagosur me plumb, ku për këtë arsye kishte statusin invalid.

Në pyetjen e përfaqësuesit të palës së dëmtuar, avokatit Ndrec Dodaj, se a kanë pasur ndonjë problem lidhur me këtë mal, e dëmtuara Muja tha se asnjëherë nuk kanë pasur asnjë problem dhe që mali është i shtetit dhe jo i familjes Bardhi.

Në anën tjetër, mbrojtësi i të akuzuarit Xhafer Bardhi, avokati Haxhi Millaku pyeti të dëmtuarën se a kishte ndonjë ide apo mendim se përse ndodhi kjo ngjarje ku dy të afërmit e saj humbën jetën, ndërsa ajo tha se më së miri e di Xhafer Bardhi.

“Në seancë theksuat se duke shkuar rrugës i keni parë me veturë vëllezërit e Xhaferit, dhe kunati i juaj Sokoli, ka kërkuar ndihmë pasi që ne e kemi ditur se i kanë nxanë drutë. Gjatë komunikimit, pyetja ime është kur kanë komunikuar, cila ka qenë përgjigjja e vëllezërve të Xhaferit”, pyeti anëtarja e trupit gjykues, gjykatësja Medie Bytyqi.

Në këtë rast, pala e dëmtuar deklaroi se gjatë komunikimit të tyre kishte qenë brenda në veturë dhe nuk ka dëgjuar asgjë.

Ndërkaq mbrojtësi i të akuzuarit Amir Bardhi, avokati Agron Hoti shtoi se nuk ka pyetje dhe i shpreh ngushëllime familjes M, kurse dy të akuzuarit i shprehën ngushëllime familjes për rastin.

Në këtë seancë ka munguar dëshmitari Fisnik Bardhi, për të cilin gjykata njoftoi do të dërgojë prapë ftesë.

Seanca u ndërpre për shkak të mungesës së rrymës elektrike dhe e radhës u caktua më 28 tetor 2022.

Sipas aktakuzës së përpiluar më 28 shkurt 2022, nga Prokuroria Themelore në Prishtinë, të pandehurit Xhafer Bardhi dhe Amir Bardhi po akuzohen se më 5 prill 2021 në vendin e quajtur “Zabel” në pyllin e fshatit Gradicë, për shkak të një mosmarrëveshje pronësore rreth së drejtës së shfrytëzimit të malit, me dashje të pandehurit Bardhi në bashkëkryerje kanë privuar nga jeta të miturin tani të ndjerin A.M 15-vjeçar dhe prindin e tij B.M.

Aktakuza thotë se të njëjtit kanë vënë në rrezik dhe jetën e personave tjerë, të dëmtuarave Valdrin, Valmir dhe Driton Muja, në atë mënyrë që derisa i pandehuri Amir Bardhi ka qenë duke ecur rrugës së malit bashkë me djalin e axhës së tij, dëshmitarin Fisnik Bardhi, aty takohen me të dëmtuarin Valdrin Muja i cili ka shkuar nga mali, vendi ku ka qenë duke prerë dru, për ta marrë traktorin dhe për të ngarkuar drunjtë të cilat kanë qenë duke i prerë në mal.

Më pas, aktakuza thotë se Amiri e ka pyetur Valdrinin se çka jani duke bërë dhe se i njëjti i tregon se janë duke prerë drunj në mal dhe më pas i dëmtuari Valdrin vazhdon rrugën në drejtim të vendit ku kanë qenë duke prerë dru, ndërsa Amiri dhe Fisniku po ashtu ndahen.

Tutje, në aktakuzë thuhet se i pandehuri Amiri nëpërmjet telefonit e njofton të pandehurin Xhafer se të dëmtuarit janë duke prerë drunj në mal të cilët bisedojnë për 62 sekonda.

I pandehuri Xhafer i cili ka qenë në shtëpi, thuhet se i merr dy drita për ndriçim të cilat vendosen në kokë, merr armën-pushkën e gjuetisë dhe nisët më veturën e tipit “Golf 2” e rrugës bëhen bashkë të dy të pandehurit dhe vazhdojnë në drejtimi të vendit ku të dëmtuarit kanë qenë duke prerë drunj.

Aty, i pandehuri Amir thuhet se ka kontribuar në kryerjen e veprës penale, duke ndriçuar me njërën dritë për të krijuar mundësinë për gjuajte të pandehurit Xhafer, e po ashtu edhe i pandehuri Xhafer ka ndriçuar me njërën dritë dhe menjëherë ky i fundit ka shtënë me armë në drejtim të të dëmtuarit tani të ndjerit A.M i cili në atë moment bërtet “babë më rroki”.

Pastaj, kur i ndjeri B.M dhe i dëmtuari Valdrin shkojnë në drejtim të A.M për t’i dhënë ndihmë, atëherë thuhet se i pandehuri Xhafer prapë shkrep dhe e qëllon tani të ndjerin B.M në kokë, ku më pas i thotë të pandehurit Amir “ikim bir se u bo m**”.

Aktakuza thotë, se në vendin e ngjarjes janë gjetur 16 gëzhoja të vogla me të cilat i kanë rrezikuar edhe të dëmtuarit Valdrin,Valmir dhe Driton Muja, të cilët kanë qenë prezent duke prerë dhe bartur drunj, ku këta dy të fundit janë alivanosur pas dy të shtënave.

Gjithnjë sipas aktakuzës, për të ndjerin A.M në Qendrën e Mjekësisë Familjare në Drenas konstatohet vdekja e tij, ku vdekja e tij është e dhunshme dhe ka ardhur si rrjedhojë e gjakderdhjes masive të brendshme dhe të jashtme si pasojë e veprimit dinamik të predhave të hedhura nga arma e gjuetisë.

Ndërsa, i ndjeri B.M pëson lëndime të rënda trupore ku më 15 prill 2021 ndërron jetë në QKUK edhe ai si pasojë e plagëve vdekjeprurëse.

Me këtë të pandehurit Bardhi akuzohen se në bashkëkryerje kanë kryer veprën penale “Vrasje e rëndë” nga neni 173 paragrafi 1 pika 1.1, 1.5 dhe 1.11 lidhur me nenin 31 të Kodit Penal të Republikës së Kosovës.

Kurse, sipas dispozitivit të dytë të kësaj akuze, i pandehuri Xhafer në kundërshtim me ligjin e zbatueshëm lidhur me armë të tilla ka pasur në posedim armën-pushkën e gjuetisë të cilën e ka punuar vet.

E me këtë, i pandehuri Xhafer Bardhi akuzohet edhe për veprën penale “Mbajtja në pronësi, kontroll ose posedim të paautorizuar të armëve” nga neni 366 paragrafi 1 të KPRK-së./BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Shpërndaje këtë lajm në:

Më shumë