Menaxheri i marketit denoncon se hajnat ia vodhën 30 mijë euro nga zyra, Policia nis hetimet
Një fenomen mjaft shqetësues për qytetarët e Kosovës janë bërë edhe vjedhjet e shpeshta nëpër dyqane, që po shkaktojnë ankth e pasiguri, por edhe humbje të mëdha. Jo rrallëherë hajnat arrijnë të kapin vlera të majme parash dhe të ikin, pa lënë ndonjë gjurmë, raporton Gazeta Sinjali.
Një rast i tillë dyshohet se ka ndodhur mbrëmë në qendrën tregtare ‘Bas Market’ në rrugën “Dëshmorët e Kombit” në Viti, ku hajnat kanë hyrë me forcë dhe kanë vjedhur mijëra euro.
Sinjali mëson se menaxheri i kësaj pike (emër i njohur për redaksinë) e ka denoncuar rastin në Polici, ku ka raportuar se nga zyra e tij janë vjedhur rreth 30 mijë euro para të gatshme.
Vjedhja dyshohet të jetë kryer pas mesnate, periudhë kjo që është shfrytëzuar nga të dyshuarit.
Si rezultat i denoncimit të rastit, njësitë policore kanë dalë në vendin e ngjarjes ku kanë kryer ekzaminimet e nevojshme që ndihmojnë në zbardhjen e rrethanave dhe në identifikimin e personave të dyshuar.
Me urdhër të Prokurorit të Shtetit, rasti është iniciuar ‘Vjedhje e rëndë’, ndërsa veprimet tjera ligjore do merren posa të kapen të dyshuarit.
