Feronikeli dhuron spektakël në fitoren ndaj Flamurtarit
Feronikeli ka dhuruar ndeshjen më të mirë këtë edicion, të zhvilluar sot (e enjte), në Rexhep Rexhepi, kundër klubit nga kryeqyteti, Flamurtari.
Raste të njëpasnjëshme për gol u krijuan në pjesën e parë, me Hotin që tentoi dy herë, e pastaj Rexha e Fazliu goditjet e të cilëve nuk hynin asessi në portën kundërshtare, madje goditja e Astrit Fazliut qëlloi edhe shtyllën.
Hoti në tentimin e tretë të tij u tregua i suksesshëm, pasi kësaj radhe topi përfundoi në rrjetë, saktësisht në minutën e 39-të, të takimit.
Në pjesën e parë nuk pati gola të tjerë, përkundër rastit të qindpërqind të Jean Cariocas.
Pjesa e dytë filloi ashtu si e para, me Feronikelin që kërkonte golin e dytë, atë të sigurisë.
Hoti përsëri protagonist, ku në minutën e 50-të, pas një asisti të saktë nga Rexha, dërgoi një goditje precize në këndin e majtë të portierit, Selimaj.
Megjithatë, Flamurtari arriti të ngushtojë epërsinë në 2-1, me golin e Shend Kelmendit , në minutën e 72-të.
Rast për të trefishuar epërsinë pati i inkuadruari në lojë, Yll Hoxha, kur goditi shtyllën nga një goditje dënimi, në minutën e 86-të.
Feronikeli tani gjendet në pozitën e tretë, me nëntë pikë, kurse Flamurtari mbetet me shtatë pikë, në pozitën e gjashtë.
