Jakup Nura falënderon mbi 22 mijë votuesit: Besimi juaj është nder dhe përgjegjësi për mua
Kandidati i PDK-së që ka siguruar mandatin e deputetit në Kuvendin e Kosovës, Jakup Nura, ka falënderuar qytetarët për mbështetjen e dhënë në zgjedhjet e 7 qershorit.
Përmes një mesazhi publik, Nura tha se 22,951 votat e fituara nuk i sheh vetëm si rezultat zgjedhor, por si një përgjegjësi të madhe ndaj qytetarëve dhe Republikës së Kosovës.
Ai theksoi se gjatë gjithë jetës së tij ka qenë i udhëhequr nga ideali për t’i shërbyer vendit, fillimisht në veprimtarinë kombëtare dhe më pas gjatë luftës çlirimtare si gjeneral i Ushtrisë Çlirimtare të Kosovës.
Nura u zotua se me të njëjtin përkushtim do ta vazhdojë misionin e tij edhe në cilësinë e deputetit të zgjedhur.
“Mirënjohjen time të thellë e shpreh për secilin votues, për familjen, miqtë dhe të gjithë bashkëpunëtorët që më qëndruan pranë gjatë këtij rrugëtimi. Besimi juaj është nder dhe përgjegjësi për mua”, ka deklaruar ai.
