Koha për rikthim: Pse PDK duhet ta ftojë Fatmir Limajn sot, jo nesër
PDK po kalon një moment historik. Pas rikthimit të Ramiz Lladrovcit dhe konsolidimit të Drenasit si bastioni i shtatë i partisë, duket se fushata e 28 dhjetorit po hap një kapitull të ri brenda spektrit të djathtë kosovar. Por për ta kompletuar këtë kapitull, duhet një hap i guximshëm: rikthimi i Fatmir Limajt.
Ka kohë që demokratët ndihen të përçarë mes nostalgjisë për kohën e artë të partisë dhe realitetit aktual të një PDK-je që përpiqet të rigjejë identitetin e vet. Pikërisht këtu fillon rëndësia e Limajt. Jo thjesht si figurë politike, por si simbol i konsolidimit dhe i fuqisë së terrenit. Limaj ka qenë shtyllë e PDK-së, ndër më të organizuarit në terren dhe ndër më të respektuarit në zonat rurale, aty ku politikës i matet pesha reale.
Nëse PDK pretendon vërtet unitet, jo vetëm në fjalë, por në vepra, atëherë Fatmir Limaj e ka vendin aty ku e ka pasur gjithmonë: në qendër të projektit politik të partisë. Mëria, inatet dhe llogaritë personale nuk mund të jenë busull udhëzuese për një parti që synon të marrë qeverinë pas një administrimi të dobët që vendi po e përjeton.
Rikthimi i Limajt do t’i sillte PDK-së një përfitim të dyfishtë: forcim të strukturave në terren, ku ai ka një bazë të natyrshme dhe besnikëri politike të ndërtuar ndër vite,
konsolidimin e Malishevës, e cila do të bëhej komuna e tetë pas Drenasit, duke zgjeruar territorin ku PDK ka kontroll të plotë politik.
Ky nuk është vetëm një rikthim formal. Është një rikthim substancial që sjell bashkë një kapital të madh njerëzor. Nisma Socialdemokrate e udhëhequr nga njerëzit që dikur kishin ngritur sektorë të tërë të qeverisë, do të mund të shkrihej natyrshëm në PDK, duke i dhënë asaj një trupë të përgatitur, me eksperiencë qeverisëse dhe me rezultate të prekshme.
Kryetari i ri i PDK-së, Bedri Hamza nuk ka arsye të mbajë distancë nga figurat që dikur kanë qenë shtylla të partisë. Komandant Çeliku, është një prej tyre. Ai ishte themelues, ishte simbol dhe mbetet faktor. PDK-ja e sotme ka nevojë pikërisht për këtë profil, për njerëz që bashkojnë, jo ndajnë.
Ndaj tani është momenti, momenti i fundit që PDK të hapë derën për rikthimin e tij.
Nuk mjafton vetëm organizimi, duhet guxim.
Nuk mjafton vetëm rikthimi i votës së vjetër, duhet frymë e re.
Nuk mjafton vetëm mbështetja e bastioneve, duhet zgjerim real.
Me Limajn brenda, PDK mund të dalë forcë fituese më 28 dhjetor. Pa të, mbetet vetëm një mundësi e humbur.
Ky është test i lidershipit të ri. Dhe koha nuk pret.
