Pas 43 vitesh përkushtim në arsim, Ismet Topalli del në pension – mësuesi që nuk u ndal as në kohë lufte
Ismet Topalli lindi në fshatin Baicë të Komunës së Drenasit, ku që në fëmijëri u rrit me dashurinë për dijen dhe respektin e thellë për mësuesin. Rruga e tij në botën e arsimit nisi herët dhe shumë shpejt u bë më shumë se një profesion – u bë një mision jetësor.
Në vitin 1982, Topalli filloi punën si mësues në shkollën e fshatit Studenqan të Therandës, ku për tre vite radhazi i dha gjallëri klasave me energjinë dhe pasionin e tij. Nga viti 1985 deri në vitin 1992, ai vazhdoi punën në Kishnarekë, duke kontribuar në edukimin e brezave të rinj e duke lënë gjurmë të pashlyeshme në kujtesën e nxënësve dhe kolegëve.
Në vitin 1992, ai u bashkua me kolektivin e shkollës fillore “Ali Gashi”, ku qëndroi deri në vitin 2025. Gjatë këtyre 33 viteve, Ismet Topalli u bë një shtyllë e arsimit në atë komunitet – një mësues që nuk jepte vetëm dije, por edhe frymëzim, kulturë e vlera njerëzore.
Në periudhat e vështira të vendit, veçanërisht gjatë kohës së luftës, ai tregoi përkushtim e guxim të jashtëzakonshëm. Edhe kur mungonin pagat, kushtet e siguria, Topalli nuk ndali mësimin. Ai udhëtonte çdo ditë larg vendbanimit të tij, vetëm që nxënësit të mos mbeteshin pa dije, duke dëshmuar se për të, arsimimi ishte një thirrje e shenjtë që nuk e ndal as lufta, as mungesa, as frika.
Pas gati katër dekadash pune të palodhshme, më 23 tetor 2025, Ismet Topalli doli në pension – por jo në pushim nga pasioni për dijen. Ai mbetet një figurë e nderuar e arsimit, një njeri që ka ndërtuar me durim e dashuri themelin e shumë brezave të nxënësve që sot mbajnë me krenari mësimet e tij.
Në përfundim të karrierës, Topalli shprehu mirënjohje të veçantë për Drejtoreshën e shkollës “Ali Gashi” dhe tërë stafin arsimor e administrativ për organizimin e ngrohtë të ceremonisë së pensionimit – një gjest që pasqyron respektin e ndërsjellë dhe miqësinë e krijuar ndër vite.
Jeta dhe puna e tij janë dëshmi e qartë se një mësues i mirë nuk ndalet as kur mbyllet libri i punës, sepse mësimi i tij vazhdon të jetojë në zemrat e atyre që ka mësuar.
