Shukri Buja me të rinjtë e Lipjanit: Politikat konkrete për vetëpunësim dhe vende të reja pune
Kandidati për kryetar të Komunës së Lipjanit, Shukri Buja, ka shpalosur politikat e tij për nxitjen e punësimit të të rinjve, duke theksuar rëndësinë e ndërmarrësisë dhe bashkëpunimit me sektorin privat.
Ai tha se në mandatin e ardhshëm do të zbatojë masa konkrete si: promovimi i vetëpunësimit, praktikat e punës me pagesë në sektorin privat, programet e aftësimit dhe riaftësimit profesional në partneritet me bizneset, si dhe subvencionimi i pagave për punësimin e të rinjve.
“Këto masa janë arsyeja pse të rinjtë e Lipjanit po na bashkohen çdo ditë e më shumë, duke treguar besimin dhe përkrahjen e tyre si kurrë më parë. Kjo u vërtetua sot në takimin me të rinjtë e qytetit të Lipjanit,” tha Buja.
Ai shtoi se me rininë në krah, fitorja e tij në zgjedhjet e ardhshme është e sigurt.
