Shukri Buja viziton vendpunishtet e kompanisë M.Gashi ShPK, premton standarde më të larta në ndërtim dhe banim të përballueshëm në Lipjan
Kandidati i PDK-së për kryetar të Komunës së Lipjanit, Shukri Buja, ka vizituar sot vendpunishtet e kompanisë së ndërtimit M.Gashi ShPK, në pronësi të Mustaf Gashit, e cila po zhvillon projektin e madh “Kompleksi Grand Tower, Prishtina e Re”.
Buja e ka cilësuar këtë biznes si shembull të zhvillimit në vend, duke theksuar se përmes punësimit të një numri të madh punëtorësh nga Lipjani, kompania kontribuon në mirëqenien e shumë familjeve.
Ai premtoi se si kryetar i ardhshëm i Lipjanit, do të angazhohet për rishikimin e hartave zonale në konsultim të hapur me sektorin privat, eliminimin e ndërhyrjeve politike në këtë sektor dhe fuqizimin e stafit profesional komunal për t’i shërbyer më mirë qytetarëve.
“Ndërtimi në Lipjan do të zhvillohet dhe do të rriten standardet. Do të promovohen të drejtat e punëtorëve, sidomos siguria dhe shëndeti në punë, si dhe do të kërkojmë banim të përballueshëm dhe të qëndrueshëm për qytetarët tanë. Ky është ndryshimi që e meritojnë punëtorët, bizneset dhe çdo qytetar i komunës sonë,” tha Buja.
