Një zë i sakrificës, shpresë për të ardhmen / Vajza e dëshmorit, Qëndresa Kluna që kërkon besimin e qytetarëve të Drenasit
Në zemrën e Drenasit, aty ku amaneti i dëshmorëve mbetet i shenjtë, po ngrihet një zë i ri që buron nga dhembja, krenaria dhe vendosmëria. Është Qëndresa Kluna, vajza e një dëshmori, mësimdhënëse e përkushtuar dhe kandidate për Asamblenë Komunale të Drenasit, e cila garon krah kryetarit Ramiz Lladrovci.
Kluna thotë se nuk është vetëm një emër në listë, por zëri i brezit të ri, i rinisë që kërkon mundësi, i mësimdhënësve që duan dinjitet, i familjeve të dëshmorëve që meritojnë respekt dhe i çdo qytetari që beson në zhvillim, drejtësi dhe transparencë.
“Jam rritur me frymën e atyre që dhanë gjithçka për këtë vend. Tani është radha ime të jap kontributin tim – me dije, ndershmëri dhe përkushtim. Si mësimdhënëse, çdo ditë investoj në të ardhmen e nxënësve tanë. Si bijë e një dëshmori, mbart mbi supe një trashëgimi të shenjtë që më udhëheq në çdo hap,” është shprehur ajo.
Sipas saj, bashkë me kryetarin Ramiz Lladrovci, do të punojnë që Drenasi të jetë shembull i zhvillimit, kujdesit për familjet e dëshmorëve, mbështetjes për mësimdhënësit dhe përfshirjes së rinisë në vendimmarrje.
Qëndresa Kluna u ka bërë thirrje qytetarëve që ta mbështesin, duke theksuar se synon të jetë zëri i tyre në Asamble – zëri i të vërtetës, guximit, dinjitetit dhe shpresës.
