OVL-UÇK i reagon Speciales: Të përfundojë trajtimi çnjerëzor ndaj Thaçit dhe të tjerëve
Organizata e Veteranëve të Luftës së UÇK-së ka reaguar duke shprehur shqetësimin në lidhje me zhvillimet e fundit në Dhomat e Specializuara në Hagë, që sipas tyre, përfshijnë trajtimin e padrejtë dhe poshtërues ndaj ish-krerëve të UÇK-së.
OVL e UÇK-së tha se refuzimi i vizitës së Avokatit të Popullit nga ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi pasqyron sipas tyre, qarë nivelin e zhgënjimit dhe mospërfilljes që kanë përjetuar ata ndaj institucionit që në teori duhet t’i mbrojë të drejtat e tyre, por ka zgjedhur të heshtë përballë shkeljeve të rënda që po ndodhin.
“Qëndrimi i tyre është një mesazh i fuqishëm se kjo gjendje nuk mund të normalizohet dhe as të justifikohet. Për më tepër, kufizimet ekstreme në takimet me avokatët dhe ndërhyrjet arbitrare në përgatitjen e mbrojtjes ligjore përbëjnë cenim të drejtave themelore të njeriut dhe shkelje të rënda të së drejtës për një proces të drejtë gjyqësor”.
“Siç është raportuar në media, takimet po organizohen në mënyrë të papritur dhe në kushte të papërshtatshme, duke penguar seriozisht funksionimin efektiv të mbrojtjes. Këto shqetësime i ka ngritur edhe Avokati i Popullit i Kosovës, i cili ka deklaruar publikisht se mbajtja e gjatë në paraburgim dhe mungesa e vendimeve të drejta për lirimin e përkohshëm bien ndesh me standardet ndërkombëtare për të drejtat e njeriut dhe e përbëjnë trajtim jo të dinjitetshëm”, thuhet në reagimin e tyre.
OVL-ja parashtroi disa kërkesa për Dhomat e Specializuara, ku kërkuan përfundimin e menjëhershëm të trajtimit çnjerëzor dhe poshtërues të të paraburgosurve.
Më poshtë gjeni kërkesat e OVL-së së UÇK-së për Dhomat e Specializuara:
Të përfundojë menjëherë trajtimi çnjerëzor dhe poshtërues i të paraburgosurve.Të garantohen pa vonesë të gjitha të drejtat e tyre, përfshirë qasjen e plotë dhe të pandërprerë në mbrojtje ligjore.Avokati i Popullit i Dhomave të Specializuara të mbajë qëndrim publik ndaj shkeljeve dhe të mos bëhet palë në heshtje me një sistem të padrejtë.Të bëhet rishikim i menjëhershëm i kushteve të paraburgimit dhe të shqyrtohet seriozisht mundësia e lirimit të përkohshëm të tyre.
Luftëtarët e UÇK-së nuk kanë luftuar për drejtësi të njëanshme, për paraburgime pa fund dhe për t’u poshtëruar në emër të një drejtësie që hesht përballë padrejtësisë.
Drejtësia e vërtetë fillon me respektimin e dinjitetit njerëzor.
