“Kam me t’gri thikë, edhe n’bandera t’i kam vnu kamerat”/ Burri në Lipjan kërcënon ish bashkëshorten
Telashet me partnerët dhe familjet e tyre, nuk marrin fund gjithmonë me ndarje. Shumë gra edhe pas shkurorëzimit kanë probleme me ish-bashkëshortët të cilët jo rrallëherë ndodhë që të shkelin urdhrat mbrojtës të lëshuar nga Gjykatat dhe u shkaktojnë frikë e shqetësim ish-partnereve. Për pasojë vepra përsëritet e madje në shumë raste ka përfunduar edhe tragjikisht, raporton Gazeta Sinjali.
Një rast i frikshëm ka ndodhur dje në Lipjan, ku pas seancës gjyqësore për shkurorëzimin mes një çifti, burri dyshohet se ka drejtuar kërcënime serioze kah ish bashkëshortja e tij.
Burimet e Gazetës Sinjali brenda Prokurorisë kanë bërë me dije se viktima ishte e pajisur me urdhër mbrojtës nga Gjykata, por kjo nuk e ka ndalur të dyshuarin që ta kërcënojë se do e ‘grijë me thikë’ po e pa në qytet me një grua të cilën e ka të afërme.
E shqetësuar nga veprimet dhe fjalët e ish bashkëshortit, 34-vjeçarja ka denoncuar rastin në Polici, ku ka deklaruar se i dyshuari i ka thënë që e ka të ndaluar të shkojë në X vend dhe nipin e saj, do e presë me thikë.
Po ashtu i njëjti dyshohet se e ka kërcënuar që i ka vendosur kamerat edhe nëpër shtyllat elektrike në rrugë, në mënyrë që ta monitorojë çdo lëvizje të viktimës.
Si rezultat i denoncimit, i dyshuari është arrestuar dhe është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Mospërfillje e gjykatës’.
Ndryshe, masa mbrojtëse e ndalimit të afrimit viktimës së dhunës në familje si dhe vartësit të tij/saj dhe personave tjerë nëse është e nevojshme, mund t’i shqiptohet personit i cili ka kryer dhunë në familje, nëse ekziston rreziku i përsëritjes së dhunës në familje.
Në urdhrin me të cilin shqiptohet masa e ndalimit të afrimit viktimës së dhunës në familje, gjykata cakton vendin, regjionin dhe largësinë, brenda së cilës kryerësi nuk guxon t’i afrohet viktimës së dhunës në familje.
