Greva e nisur më 1 mars, po vazhdon edhe këtë të hënë në Gjykatën e Drenasit
Greva e nisur në fillim më mars në Gjykatën Themelore në Prishtinë, në degët Podujevë e Drenas, po vazhdon edhe këtë të hënë.
Minir Hoti, gjykatës mbikëqyrës në degën në Podujevë dhe Shefqet Baleci, gjykatës mbikëqyrës në Gjykatën në Drenas, kanë konfirmuar se greva e administratës po vazhdon, raporton “Betimi për Drejtësi”.
Edhe më tutje, seancat janë pezulluar ndërsa, po mbahen vetëm seancat e paraburgimit dhe rastet tjera urgjente.
Ndryshe, më 1 mars fillimisht ka nisur grevën stafi administrativ i Gjykatës Themelore në Prishtinë, ku në konferencën për medie të mbajtur po atë ditë nga Naim Rrustemi, kryetar i Shoqatës Sindikale të gjykatës në fjalë, u tha se greva nuk ka të bëjë me çështje politike, se po ndodhë pa vullnetin e tyre dhe se do të vazhdojë deri në plotësimin e kërkesave të tyre.
“Kërkesat tona janë: Aprovimi i Ligjit për punëtorët e Administratave të Gjykatave dhe Prokurorive duke u bazuar në Projektligjin për Plotësim dhe Ndryshim të Ligjit për Zyrtar Publik; Përafrimi i pagave të punëtorëve të administratës së gjykatave dhe prokurorive në raport me pagat e gjyqtarëve dhe prokurorëve; Pagesa lineare nga 150 euro për çdo punëtor të administratës së gjykatave dhe prokurorive deri në hyrjen në fuqi të Ligjit për Paga; Pagesa e shujtës ditore prej 3 euro dhe pagesa e udhëtimit prej 3 euro”, ka thënë Rrustemi.
Këtë grevë, Sindikata e Pavarur e Judikaturës, njoftoi se nuk e përkrah, me arsyetimin se është e njëanshme. Kurse, gjatë të mërkurës, SPJK njoftoi se greva e pezulluar më 2018, do të vazhdojë të mbetet e pezulluar deri më 14 mars.
Pas Gjykatës Themelore në Prishtinë, grevën e nisi edhe administrata e Gjykatës së Apelit dhe i gjithë stafi i administratës në Pallatin e Drejtësisë.
Por, më 2 mars, zyrtarja për informim e Gjykatës Supreme, Antigona Uka-Lutfiu, njoftoi se Supremja këtë ditë nuk po e vazhdon grevën. Megjithatë, nga 3 marsi edhe Supremja e ka vazhduar grevën.
Grevën e ka filluar edhe administrata e Prokurorisë Themelore në Pejë, Prizren dhe Ferizaj.
Ndërsa, më 14 mars, grevën e filloi edhe administrata në Gjykatën Themelore në Prizren.
Greva për momentin ka pezulluar seancat gjyqësore, në përjashtim të rasteve të parabargimit dhe atyre të dhunës në familje.
Këshilli Gjyqësor i Kosovës (KGJK), përmes një komunikate për medie, kishte njoftuar se për momentin nuk e përkrah grevën e filluar nga administrata.
Në anën tjetër, Ministria e Drejtësisë ka ftuar organizatorët që ta rishqyrtojnë vendimin për hyrje në grevë dhe të bashkëpunojnë me institucionet kompetente.
