Shala: Do të angazhohemi maksimalisht në mbrojtjen e vlerave të luftës së UÇK-së
Në vitin 2012, Qeveria e Kosovës dhe Parlamenti i Kosovës, aprovuan Planin Hapësinorë për “Zonën e Interesit të Veçantë – Shtabi i Përgjithshëm i UÇK-së Kleçkë – Divjakë”.
Kandidati për deputet nga PDK, Ferat Shala ka thënë se qëllimi i hartimit të këtij plani ishte të vihen nën mbrojtje të gjitha objektet me rëndësi të veçantë nga koha e luftës së UÇK-së në këtë zonë, duke përfshirë objektin e Shtabit të Përgjithshëm, spitalet, varrezat e dëshmorëve, pikat e rëndësisë luftarake, bunkerët e luftës, kampet e refugjatëve të luftës, objektet dhe infrastruktura e Radios “Kosova e lirë” dhe Agjencisë së Lajmeve “Kosovapres” si dhe monumentet e natyrës në këtë hapësirë.
Që nga ajo kohë, sipas Shalës, është bërë shumë pak në jetësimin e projekteve të këtij plani dhe në ruajtjen e vlerave të luftës së UÇK-së.
Ushtria Çlirimitare e Kosovës, sipas tij, është projekti më i vlefshëm dhe më madhorë për Kosovën në 100 vitet e fundit.
“Zotohemi se në mandatin e ardhshëm të Qeverisë së Kosovës, me Kadri Veselin kryeministër, do të angazhohemi maksimalisht në mbrojtjen e vlerave të luftës së UÇK-së, dhe në promovimin dhe ruajtjen e këtyre vlerave historike me përmasa kombëtare me projekte konkrete, përfshirë edhe projektet për Planin Hapësinorë për “Zonën e Interesit të Veçantë- Shtabi i Përgjithshëm i UÇK-së Kleçkë – Divjakë’’. Zotohemi se do të ndërtojmë një të ardhme më të mirë për të gjitha kategoritë e daluara nga lufta, përmes përmirësimit të mirëqenies sociale dhe ekonomike të këtyre kategorive”, ka thënë Shala./DrenicaOnline/
