Veteranët e UÇPMB-së të zhgënjyer me prokurorinë, kërkojnë rishiqimin e listave
Prokuroria Speciale e Kosovës ka dërguar në Gjykatën Themelore të Prishtinës aktakuzën për listat e veteranëve të cilët ajo konsideron se kanë përfituar jashtëligjshëm pensione. Numri i tyre kap shifrën prej 20 mijë, ndërkaq që aktakuzë është ngritur ndaj pjesëtarëve të Komisionit Qeveritar për njohjen e statusit të veteranit.
Gjatë këtyre ditëve janë publikuar pjesë të aktakuzës e cila është dërguar në Gjykatë për rastin “veteranët”.
Si pjesë e kësaj aktakuze janë publikuar dhe listat e veteranëve të cilët Prokuroria i ka cilësuar si mashtrues, dhe të cilët pa të drejtë kanë përfituar pensionet.
Sipas prokurorisë, keqpërdorime dhe manipulime janë vërejtur edhe në zonën e Luginës së Preshevës. Si veteranë “mashtrues”, Prokuroria Speciale e Kosovës ka listuar gjithësej 207 pjesëtarë që pretendonin se ishin pjesë e UÇPMB-së.
Lajmi.net ka kontaktuar sot me kryetarin e OVL UÇPMB-së, Nazmi Hajredinin. I njëjti ka thënë se Prokuroria nuk guxon të prekë mbi veteranët e vërtetë të luftës, dhe se ata të cilët janë përgjegjës krijimin e kësaj situate duhet të japin përgjegjësi.
“Veteranët e vërtetë nuk guxojnë të preken, ata të pandershmit duhet të japin përgjegjësi bashkë me atë që me vetëdije i kanë futur në lista”, ka thënë Hajredini.
Megjithatë, Hajredini ka potencuar se ai nuk është në dijeni se ka pasur keqpërdorime edhe në listat e UÇPMB-së, pasi sipas tij nuk është dhënë llogari në organizatën që ai udhëheqë.
“Ne nuk jemi në dijeni për këto keqpërdorime, pasi që neve nuk na japin llogari si zyrë e OVL UÇPMB-së në Kosovë Lindore”, ka thënë ai.
Tutje Hajredini ka thënë se Prokuroria e Kosovës duhet të bëjë rishiqimin e këtyre listave dhe të kërkojë një verifikim të saktë pa ngjyrime politike dhe partiake.
Kujtojmë, që sipas prokurorisë rreth 20 mijë veteranë të rrejshëm buxhetit të Republikës së Kosovës, i kanë shkaktuar dëme në shumë prej 68.153.533.14 euro.
