Lajm me interes për nxënësit: Në këto data mbahet testi i Maturës Shtetërore
Ministri i Arsimit, Shyqiri Bytyqi, deklaroi sot se këtë vit organizimi i Testit të Maturës do të ndahet në katër regjione, për shkak të menaxhimit sa më të mirë të testit.
Këtë deklaratë i pari i Arsimit në vend e bëri në takimin e Komisionit të Maturës Shtetërore, ku është diskutuar rreth përgatitjeve për organizimin e Maturës Shtetërore 2018.
Bytyqi u shpreh bindur se testi i maturës do të ketë rezultate të mira dhe do të administrohet me sukses.
Ndërsa, kryetari i Komisionit për maturën shtetërore, Fehmi Hysenaj, tha se dizajnimi i testit të maturës do të jetë ndryshe dhe se kalueshmëria është 40 për qind.
Ai tha se telefonat nuk do të lejohen gjatë testimit, madje edhe administratorët e testit nuk do të lejohen të kenë telefona.
“Regjioni i Prizrenit dhe Gjakovës do ta mbajë testin me 30 maj 2018 dhe pjesa e dytë më 7 qershor, Mitrovica dhe Peja më 31 maj dhe pjesa e dytë më 8 qershor. Ferizaj dhe Gjilani më 28 maj dhe pjesa e dytë më 5 qershor, Prishtina më 29 maj, ndërsa testi i dytë më 6 qershor”, tha ai.
