MTI ka hequr nga tregu 2 mijë e 440 produkte

Në raportin final të punës së Ministrisë së Tregtisë dhe Industrisë për një vit, shihet se Kosova më shumë ka importuar sesa ka eksportuar mallra.

Të dhënat e paraqitura në raportin e MTI-së tregojnë se 2 miliardë e 283 milionë euro është vlera e mallrave të importuara.

Ndryshe Kosova ka arritur të eksportoj mallra vetëm në vlerën e 253 milionë eurove, siç bën të ditur vet Ministria.

Derisa për mbikëqyrjen e tregut të naftës  MTI  ka lëshuar 473 licenca.

“..Gjatë kësaj periudhe janë lëshuar 473 licenca; janë refuzuar 16; janë revokuar 13. Janë gjithsej 863 pika për shitje me pakicë të dizelit dhe benzinës. Prej tyre: 646  janë në funksion, dhe  217 janë jashtë funksionit”, bën të ditur raporti.

Numri i mostrave të marra ka shënuar rritje në krahasim me vitin 2015.

“.Janë realizuar 733 inspektime të tregut; janë tërhequr nga tregu 2,440 produkte. Është zbatuar Plani i Monitorimit të cilësisë së naftës dhe derivateve të naftës, janë marrë 580 mostra në pikat shitëse me pakicë, deponitë dhe kompanitë  publike,  ku nga 580 mostrat e marra,  534 kanë rezultuar konform standardeve (ose 92.1%), dhe 46 mostra jo konform (ose 7.9%). Krahasuar me 2015 numri i mostrave të marra gjatë këtij viti është rritur për 58%”, thuhet më tej në raport.

MTI ka filluar inspektimin edhe të pikave shitëse të karburanteve, të cilat ushtrojnë veprimtarinë pa licencë në komunat, Mitrovicë e Veriut, Zubin Potok, Leposaviq, e Zvecan.

“Është krijuar trupi koordinues nacional për mbikëqyrjen e tregut; Janë kompletuar pajisjet për laboratorin mobil me të cilin do të rritet numri i verifikimit të cilësisë së karburanteve të lëngëta të naftës në tregun e brendshëm të Kosovës; Është krijuar dhe funksionalizuar databaza për shkëmbim të produkteve të pa sigurta konform databazës evropiane RAPEX”.