Veteranit invalid të UÇK-së i bëhet surprizë banesa e re

Veterani i UÇK-së njëherit invalid i luftës Nezir Berisha nga fshati Volljakë i Klinës bëhet me banesë të re. Kjo falë shoqatës bamirëse “Jetimat e Ballkanit”, e cila arriti të grumbullojë mjete nga donatorë dhe vullnetmirë, të cilët iu përgjigjen ftesës për ta ndihmuar këtë veteran që jetonte me gruan dhe 6 vajzat në gjendje të mjerueshme.

Drejtori i kësaj shoqate, Halil Kastrati thotë se edhe pse nuk është arritur shuma e duhur e parave,  banesa do të përkthehet në emrin e Nezirit, ndërsa apeloi tek të gjithë bamirësit të kontribuojnë në mënyrë që të mbledhin shumën totale.

“Banesa është blerë 23 mijë euro, e falënderoj pronarin Naim Topalli nga fshati Baincë i Drenasit i cili me të vërtetë u tregua shumë solidar me ne për çmimin e banesës. Shpresojmë të kemi bamirës që na ngjisin dorën dhe të arrijmë pagimin komplet të banesës”, thotë ai, transmeton ekonomiaonline.

Ai thotë se përveç blerjes edhe e kanë mobiluar banesën, e cila komplet ka kushtuar 2000 euro. E kryefamiljari Nezir Berisha është shprehur i lumtur.

Ai falënderoi Halil Kastratin dhe të gjithë ata që ia mundësuan të bëjë një jetë më ndryshe. Banesa është 76 metra katror, ka dy dhoma gjumi dhe një sallon me kuzhinë.