Lladrovci pret në takim ish-zëvendës kryetarin e Parlamentit Izraelit
Kryetari i Komunës së Drenasit, Ramiz Lladrovci, të premten ka pritur në takim, ish-zëvendësin e kryetarit të Parlamentit të Izraelit, z. Yehiel Hilik Bar dhe një delegacion në përbërje të Damian Brikman, përfaqësues i kompanisë Kidik, dhe Labinot Ademi nga kompania Menora Enkidu.
Fillimisht Lladrovci i falënderoi për vizitën dhe njoftoi delegacionin për mundësitë që Komuna e Drenasit ofron për investitorët e huaj për bashkëpunim në sfera të ndryshme me interes për të dy palët dhe qasjen proaktive të qeverisjes së tij në rritjen e bashkëpunimit dhe tërheqjen e investimeve të huaja, veçanërisht ato izraelite si me interes e domethënie të veçantë për Komunën e Drenasit.
z. Hilik Bar falënderoi kryetarin Lladrovci për pritjen, ndau pjesë nga përvoja e tij në qeverisje dhe shprehu gatishmërinë për bashkëpunim në fushën e arsimit, sigurisë kibernetike dhe në industrinë e mençur në përgjithësi, si dhe në bujqësi.
Në takim u dakordua që bashkëpunimi të thellohet dhe konkretizohet më tej përmes një takimi në nivel ekspertësh.
Kryetari Lladrovci u dha delegacionit dhurata punëdore nga Qendra për promovimin e të drejtave të grave në Drenas.
