Miku i Lladrovcit emërohet Konsull i Nderit i Republikës së Kosovës në Maqedoni
Në Shkup, sonte, kryetari i Komunës së Drenasit, Ramiz Lladrovci, ishte i ftuar i nderit, në darkën e mikut të tij, Arsim Prapanikut, me rastin e emërimit të tij, Konsull i Nderit i Republikës së Kosovës në Maqedoni.
Kjo darkë solemne, bashkoi sërish miqtë dhe kontribuuesit e lirisë së Kosovës, Luginës së Preshevës dhe Maqedonisë, me bashkëveprimtarët e bashkëluftëtarët nga kjo pjesë e trojeve etnike.
“Gjithsesi, Arsim Papraniku, me angazhimin e tij dhe përkushtimin atdhetar, me plotë meritë, është Konsull nderi, i cili në mënyrën më shembullore do të prezantoj interesat e Kosovës, ashtu siç ishte flamurtar i interesave të Kosovës në kohë tepër të vështirë”, ka thënë Lladrovci.
Sipas tij, diplomacia jonë, me këtë emërim, fiton krah të fortë në vendin mik që ka të njëjtat synime me vendin tonë, integrimin euro-atlantik. Por, edhe zhvillimi ekonomik, mbështetet në patriotët me vizion të përparuar për zhvillim, një nga ta është edhe Arsimi, i cili, interesin e Kosovës dhe shqiptarëve kudo jetojnë, e kishte dhe ka prioritet të angazhimit të tij. “Krenar me ty, Konsull nderi, miku im, Arsim Papraniku!”, ka thënë Lladrovci./DrenicaOnline/
