Kadri Veseli shtron iftar
Kryetari i Kuvendit të Kosovës, Kadri Veseli, ka shtruar sonte iftar për përfaqësuesit e Bashkësisë Islame të Kosovës, nxënës të Medresesë, artistë dhe personalitete tjera, në nder të muajit të shenjtë të Ramazanit.
Veseli deklaroi se Ramazani është muaji që simbolizon vlerat më universale të moralit njerëzor.
“Besimi është forca shpirtërore që mposhtë etjen dhe urinë. Është forca që mposhtë pengesat dhe dëshpërimin që shpesh herë i sjellin sfidat e jetës. Është shpresa për të ardhmen, që i bën njerëzit e popujt të qëndrueshëm përballë sfidave të historisë”, tha Veseli.
Veseli tha se Bashkësia Islame e Kosovës historikisht ka qenë një institucion në shërbim të atdheut e kombit dhe e e tillë është edhe sot.
Kryekuvendari kujtoi hoxhallarët që në kohë e rrethana të ndryshme kontribuuan e dhanë jetën për lirinë e kombin tonë, që nga Haxhi Zeka, Hoxhë Kadri Prishtina, Mulla Idriz Gjilani, Mulla Ilaz Broja e deri tek 37 hoxhallarët që ranë dëshmorë të Ushtrisë Çlirimtare të Kosovës.
“Ne kurrë nuk do ta harrojmë sakrificën e tyre dhe duke u nisur nga kjo, do të punojmë pandërprerë për ta bërë të sigurt lirinë tonë, shtetin tonë dhe të ardhmen e fëmijëve të Kosovës në këtë tokë të bekuar nga Zoti”, përfundoi ai.
