Kryesia e Kuvendit e mban peng buxhetin e vitit 2017
Ka më shumë se dy javë kur projektligji për buxhetin e vitit 2017 ndodhet në kryesinë e Kuvendit të Kosovës, e cila edhe më tej nuk dihet se kur do të caktoj një datë të saktë për mbajtjen e seancës për votimin e këtij projektligji.
Ndonëse data 22 nëntor është afati kur duhet të votohej projektligji për buxhetin, kryesia e Kuvendit e ka vënë atë në rendin e projektligjeve që nuk kërkojnë urgjencë.
Naser Osmani kryetar i Komisionit për Buxhet dhe Financa ka thënë se buxheti për vitin 2017 ka kaluar në këtë komision dhe është përgjegjësi e anëtarëve të kryesisë së Kuvendit të Kosovës se kur ata do të caktojnë mbajtjen e seancës për votim.
“Çështja e buxhetit për vitin 2017 nuk tani nuk ka të bëjë me Komisionin për Buxhet dhe Financa për shkak se caktimi i seancës për votimin e tij i takon kryesisë së Kuvendit të Kosovës. Tani duhet të shohim sepse ka kërkesa për seanca tjera më urgjente por gjithsesi kjo mbetet çështje e kryesisë së Kuvendit. Komisioni e ka kaluar dhe e ka aprovuar për seancën e radhës”, ka thënë Osmani për Indeksonline.
Ndërkaq edhe shefi i grupit parlamentar të PDK-së, Zenun Pajaziti ka thënë se për Indeksonline se projektligji për buxhetin e vitit të ardhshëm është i rëndësisë së veçantë për funksionalizimin e shtetit dhe se janë duke e pritur kryesinë e Kuvendit, që të caktojnë një datë për mbajtjen e një seance të rregull për votimin e tij.
“Nuk kemi ende kurrfarë informacioni nga kryesia e Kuvendit se kur do të sjellin në kuvend për votim buxhetin e vitit të ardhshëm. Për momentin janë duke u shqyrtuar disa kërkesa më urgjente për mbajtje të seancave, me siguri që deri në fund të muajit kryesia do ta caktoj një seancë për votim”, ka thënë Pajaziti.
