Pensionohet mësuesi Halim, vëllai i Jakup Krasniqit – 35 vite mes dijes, sakrificës dhe luftës
Pas 35 viteve shërbim të palodhshëm në arsim dhe kontributit të çmuar në lirinë e vendit, është pensionuar Halim Krasniqi, vëllai i ish-kryetarit të Kuvendit të Kosovës, Jakup Krasniqi. Ai për dekada të tëra ishte mësimdhënës në shkollën e fshatit Negroc të Drenasit dhe njëkohësisht një prej pjesëtarëve të hershëm të Ushtrisë Çlirimtare të Kosovës.
Në një rrëfim emocional me rastin e daljes në pension, Krasniqi ka kujtuar fillimet e tij në mësuesi në vitet e 90-ta, kur përballja me mungesën e pagave dhe kushteve elementare nuk e ndali për asnjë moment në misionin e tij për të sjellë dritë nëpër klasat e Kosovës. “Dashuria për dijen dhe për nxënësit tanë ishte më e madhe se çdo vështirësi,” ka thënë ai, transmeton portali DrenicaOnline.
Por rrugëtimi i Halim Krasniqit nuk ishte vetëm ai i dijes. Me bindje të thellë për liri dhe drejtësi, ai iu bashkua UÇK-së pranë komandantit legjendar Adem Jashari, duke dhënë kontributin e tij në luftën për çlirim. “Sepse jeta pa liri nuk ka kuptim,” thekson ai me krenari.
Pas luftës, ai u rikthye në shkollë, aty ku nisi gjithçka, duke ndihmuar në rindërtimin e arsimit mbi themelet e lirisë dhe ëndrrës për një Kosovë më të ditur.
“Edhe pse po dal në pension, mbetem gjithmonë i gatshëm të jap ndihmën time kurdoherë që kërkohet për vendin, për njerëzit e mi, për të ardhmen tonë,” shkruan mes tjerash në letrën e tij të ndjerë për nxënësit, kolegët dhe gjithë banorët.
Halim Krasniqi largohet nga bankat e shkollës si mësues, por mbetet një shembull i rrallë i përkushtimit ndaj dijes, atdheut dhe brezave të ardhshëm. Urime pensionimi, mësuesi Halim!/DrenicaOnline/
