Numërohen 100% e votave në Drenas, PDK fiton mbi 19 mijë vota apo 74.62% të votave
Partia Demokratike e Kosovës (PDK) ka shënuar një fitore të thellë në komunën e Drenasit, duke marrë 74.62% të votave në zgjedhjet e fundit. Sipas rezultateve preliminare të publikuara nga Komisioni Qendror i Zgjedhjeve (KQZ), PDK ka marrë 19,014 vota, duke lënë pas me diferencë të madhe Lëvizjen Vetëvendosje (LVV) që ka siguruar 4,382 vota ose 17.20%, transmeton portali DrenicaOnline.
Ndërkohë, Lidhja Demokratike e Kosovës (LDK) ka arritur të marrë vetëm 3.05% të votave (776 vota), ndërsa koalicioni AAK-NISMA ka siguruar 2.85% të votave (727 vota). Po ashtu, Koalicioni për Familje ka grumbulluar 347 vota (1.36%), ndërsa Iniciativa e Re Demokratike e Kosovës (IRDK) ka marrë vetëm 59 vota (0.23%).
Këto rezultate konfirmojnë dominimin e vazhdueshëm të PDK-së në Drenas, një bastion i saj tradicional. Votat me kusht, votat e personave me nevoja të veçanta dhe votat jashtë Kosovës nuk janë përfshirë ende në këto rezultate preliminare.
DrenicaOnline do të vazhdojë të sjellë informacione të detajuara rreth zgjedhjeve dhe reagimeve pas këtij rezultati.
