Drejtori i Urbanizmit në Drenas bën thirrje për mbështetje të PDK-së dhe Adnan Thaçit
Drejtori i Urbanizmit në Komunën e Drenasit ka bërë një thirrje publike drejtuar bashkëvendësve të tij në fshatin Llapushnik, duke i ftuar që më 9 shkurt të mbështesin Partinë Demokratike të Kosovës dhe kandidatin për deputet, Adnan Thaçi, i cili garon me numrin 82 në listën e PDK-së.
Ai theksoi se Llapushniku ka qenë gjithmonë një bastion i patriotizmit dhe sakrificës, dhe tani ka një obligim moral dhe politik për të mbështetur kandidatin e tij në rrugëtimin drejt Kuvendit të Kosovës.
“Llapushniku, që dikur dridhi Jugosllavinë dhe u bë arenë debatësh në NATO dhe OKB, sot ka një detyrë tjetër – të mbështesë 100% Partinë Demokratike të Kosovës dhe Adnan Thaçin”, tha ai në deklaratën e tij.
Sipas tij, lista e PDK-së përfshin personalitete të dëshmuara, patriotë dhe çlirimtarë me integritet, të cilët do të jenë zëri i qytetarëve në parlament. Ai gjithashtu e lidh këtë mbështetje me përkrahjen për kandidatin e PDK-së për kryeministër, Bedri Hamza, duke theksuar se kjo është rruga për një Kosovë më të mirë.
Në fund të thirrjes, ai u shpreh mirënjohës për të gjithë ata që kanë qenë të angazhuar në fushatë dhe ftoi çdo qytetar të Llapushnikut që të votojë për PDK dhe kandidatët e saj nga Drenasi.
DrenicaOnline do të vazhdojë të raportojë mbi zhvillimet nga fushata zgjedhore dhe mobilizimi i votuesve në rajon.
