Arbnor Shabani nga Aqareva, përfundon me sukses masterin në Universitetin Teknik të Vjenës: “Këmbëngulja është çelësi i suksesit”
Arbnor Shabani nga fshati Aqarevë i Drenicës ka përfunduar me sukses studimet master në Universitetin Teknik të Vjenës, në drejtimin e Gjeodezisë. Ai ndan përvojën e tij duke theksuar rëndësinë e këmbënguljes dhe përkushtimit për të arritur qëllimet akademike, pavarësisht sfidave.
“Çdo fillim i studimeve është i vështirë, pasi çdo vend ka kulturën dhe mënyrën e tij të jetës që ndryshon nga ajo e Kosovës. Megjithatë, me përkushtim dhe qasje të duhur studimore, çdo gjë është e arritshme”, thotë Arbnori, duke theksuar se grupi i tyre prej pesë studentësh të gjeodezisë është përballur dhe ka kaluar shumë sfida gjatë këtij rrugëtimi.
Ai u bën thirrje studentëve shqiptarë, si atyre që janë tashmë në studime ashtu edhe atyre që planifikojnë të studiojnë jashtë vendit, që të mos dorëzohen. “Punoni shumë, studiojeni lëndën në thellësi dhe mos u përqendroni vetëm në mësimin mekanik,” shton ai, duke i inkurajuar të gjithë për të ndjekur me këmbëngulje ëndrrat e tyre akademike.
Arbnori është një shembull frymëzues për të rinjtë, duke dëshmuar se përkushtimi dhe dëshira për dije mund të kapërcejnë çdo pengesë.