Gjoshi: E dhimbshme ta shohësh Jakup Krasniqin duke bërë homazhe te varri i vëllait në mungesë të plotë lirie
Betim Gjoshi, anëtari i kryesisë së PDK-së ka komentuar vizitën e sotme të Jakup Krasniqit në vendlindje.
Ai thotë se Krasniqin e kishte pasur mësues të historisë dhe është e dhimbshme ta shoh atë që pas gjysëm shekulli kontribut për lirinë e atdheut të bëjë homazhe te varri i vëllait në mungesë të plotë lirie.
Postimi i Gjoshit:
Është e dhimbshme ta shoh Jakup Krasniqin, mësuesin tim të historisë, që pas gjysëm shekulli kontribut për lirinë e atdheut të bëjë homazhe te varri i vëllait në mungesë të plotë lirie.
Këto janë pamje të dështimit të Evropës që duket se e ka humbur rrugën dhe është larguar nga vlerat mbi të cilat njerëzit u frymëzuan për liri.
Bota do të përfundonte në tirani e errësirë nëse nuk do të kishte luftëtarë të lirisë.
Sot, Ukraina është shembulli i mbrojtjes së vlerave që Evropës dhe Perëndimit i janë dashur qindra vite që t’i arrijë.
Për këto vlera, dje shembulli ishte Jakup Krasniqi dhe shokët e tij.
