Ka ndërruar jetë mësuesi Osman Jakupi, figurë e arsimit dhe e sakrificës nga Skenderaj
Në kujtim të mësuesit Osman Jakupi – figurë e arsimit, sakrificës dhe atdhedashurisë nga Skenderaj
Sot ka ndërruar jetë në moshën 77-vjeçare mësuesi Osman Jakupi nga fshati Baks i komunës së Skenderajt, një emër i respektuar i arsimit dhe i qëndresës qytetare, i cili la pas një trashëgimi të çmuar arsimore, shoqërore dhe atdhetare.
Mësuesi Osman ia kushtoi gjithë jetën arsimit dhe edukimit të brezave. Për rreth 45 vite me radhë ai shërbeu me përkushtim të jashtëzakonshëm, kryesisht në shkollën e Qirezit, duke u bërë një nga figurat më të rëndësishme të arsimit në atë trevë. Breza të tërë nxënësish u formuan me dijen, urtësinë dhe vlerat njerëzore që ai përcillte, duke lënë gjurmë të pashlyeshme në komunitet.
Gjatë kohës së komunizmit, Osman Jakupi u përball me diferencime politike dhe padrejtësi, por asnjëherë nuk u përkul. Ai mbeti i palëkundur në rrugën e dijes dhe të së vërtetës, duke qenë shembull i mësuesit të ndërgjegjshëm, qytetarit të ndershëm dhe njeriut me integritet.
Në vitet ’90, ai u angazhua me guxim në proceset e pajtimit të gjaqeve, duke kontribuar në qetësimin e gjendjes dhe forcimin e unitetit kombëtar. Fjala e tij ishte e urtë dhe e peshuar, gjithmonë në shërbim të paqes, pajtimit dhe vëllazërisë.
Gjatë luftës së fundit në Kosovë, Osman Jakupi u organizua në strukturat e mbrojtjes civile, duke ndihmuar popullin dhe duke rrezikuar jetën e tij. Ai u arrestua dhe u burgos politikisht nga forcat okupatore serbe, duke kaluar rreth një vit në burg. Në këtë periudhë ai përjetoi tragjedi të rënda familjare: forcat serbe i vranë vëllain Haxhiun, si dhe dy djemtë e vëllait, Fazliun dhe Muhametin, ky i fundit ende fëmijë. Pas këtyre ngjarjeve, ai u torturua rëndë, duke pësuar pasoja serioze fizike dhe shpirtërore.
Gjatë burgosjes, mësuesi Osman jetonte me ankthin për fatin e dy djemve të tij, të cilët i quante me përkëdheli Meni dhe Gazi, si dhe për djemtë e vëllait, Avnin dhe Bajramin, pa pasur asnjë informacion nëse kishin shpëtuar nga sulmet barbare. Dhimbjen, mallin dhe shqetësimin i shprehte përmes letrave që dërgonte nga burgu përmes Kryqit të Kuq.
Edhe pas luftës, ai vazhdoi misionin e tij fisnik në shërbim të arsimit. Pas pensionimit, u përball me sëmundje të rënda, të cilat familjarët i lidhin me torturat dhe vuajtjet e përjetuara gjatë luftës.
Ndarja nga jeta e mësuesit Osman Jakupi përbën një humbje të madhe për familjen, nxënësit dhe gjithë komunitetin e Skenderajt. Ai do të kujtohet si mësues i madh, pajtues, veprimtar i paqes, atdhetar i palodhur dhe njeri që ia kushtoi jetën popullit dhe atdheut.
Qoftë i përjetshëm kujtimi për të.
Lavdi jetës, punës dhe sakrificës së mësuesit Osman Jakupi.
