Drenasi mbetet pa ujë që nga orët e hershme të mëngjesit
KRU “Prishtina” ka njoftuar se nga ora 05:00 e mëngjesit ITU Shkabaj ka dalë jashtë funksionit, për shkak të nivelit shumë të lartë të turbullirave në kanalin Ibër–Lepenc, si pasojë e punimeve që po zhvillohen atje.
Për këtë arsye, pa furnizim me ujë kanë mbetur: Drenasi, Fushë Kosova, Obiliqi, një pjesë e lagjes Kalabria në Prishtinë dhe pikat e larta të lagjes Arbëria.
Ndikime dhe reduktime priten edhe në disa zona të tjera të kryeqytetit.
Sipas njoftimit, ekipet e KRU “Prishtina” janë në terren dhe po monitorojnë situatën vazhdimisht. Furnizimi me ujë do të rikthehet menjëherë sapo të stabilizohen parametrat në kanalin furnizues.
Kompania u kërkon qytetarëve mirëkuptim, duke theksuar se situata ka ardhur pa fajin e KRU “Prishtina”, pasi kanali Ibër–Lepenc nuk menaxhohet prej tyre. Ndërkohë, ITU Albanik dhe Badoci po punojnë me kapacitet maksimal për trajtimin e ujit.
