Sejdi Hoxha alarmon: Ndalimi i prodhimit në Feronikel rrezikon 814 punëtorë
Anëtari i Këshillit Drejtues të PDK-së, Sejdi Hoxha, ka reaguar ashpër pas ndalimit të prodhimit në Feronikel, një nga gjigantët ekonomikë të vendit. Ai ka ngritur shqetësimin se ky vendim, i diktuar nga çmimi i lartë i energjisë, po rrezikon drejtpërdrejt 814 punonjës dhe familjet e tyre.
“Koha për të vepruar! Feronikeli është detyruar të ndalojë prodhimin për shkak të çmimit të lartë të energjisë. Ky vendim rrezikon mirëqenien financiare të qindra familjeve dhe të shumë të tjerëve që kanë raporte kontraktuale me kompaninë”, ka deklaruar Hoxha.
Ai ka bërë thirrje që Qeveria të trajtojë këtë çështje si prioritet urgjent, duke kërkuar një zgjidhje të shpejtë në bashkëpunim me menaxhmentin e kompanisë.
“Në asnjë mënyrë nuk duhet lejuar që punëtorët dhe familjet e tyre të dëmtohen, sepse ata nuk janë fajtorë në këtë situatë”, ka theksuar ai, duke akuzuar ekzekutivin për mungesë veprimi.
Hoxha ka përmbyllur reagimin e tij me një kritikë të ashpër ndaj institucioneve duke i quajtur: “Qeveri e varfërisë!”
