Dy persona ekzekutojnë rreshterin Lika – Në 2021 i ishte djegur lokali në Kaçanik

Rreshteri i Policisë së Kosovës, Muhamed Lika, u vra mbrëmë nga dy persona ende të paidentifikuar, të cilët u larguan menjëherë nga vendi i ngjarjes, ka konfirmuar Kryeprokurori i Ferizajt, Burim Çerkini në një konferencë për media transmeton portali DrenicaOnline.

Sipas tij, viktima u qëllua teksa po kthehej nga puna dhe po hynte në banesën e tij. Hetimet intensive kanë nisur menjëherë, me bashkëpunimin e Prokurorisë dhe Policisë së Kosovës, për të zbuluar autorët dhe motivin e kësaj vrasjeje të rëndë.

Ndërkohë, prokurori Çerkini ka bërë të ditur se në vitin 2021, Likës i ishte djegur një lokal në qendër të Kaçanikut. Megjithatë, deri tani nuk ka prova që e lidhin këtë ngjarje me vrasjen e tij.
“Prokuroria po shqyrton të gjitha pistat, por nuk ka ende dëshmi që tregojnë një lidhje mes dy rasteve,” ka deklaruar ai.

Vrasja e rreshterit Lika ka tronditur opinionin publik, ndërsa autoritetet po punojnë intensivisht për të zbardhur ngjarjen. /DrenicaOnline/