Ky është 58-vjeçari i vrarë në Podujevë, nesër i jepet lamtumira e fundit
Incidenti me të shtënat me armë që u dëgjuan mbrëmjen e djeshme në fshatin Dumnicë e Epërme në Podujevë përfundoi tragjikisht. Për motive akoma të panjohura, një 58-vjeçar dyshohet se është vrarë me armë zjarri, në afërsi të shtëpisë së tij. Hetimet lidhur me këtë rast tashmë kanë nisur, ndërkohë që akoma nuk janë identifikuar personi apo personat e dyshuar, raporton Gazeta Sinjali.
I ndjeri Salih Salihu u qëllua me plumb në kokë dhe fatkeqësisht nuk arriti t’iu mbijetojë plagëve që mori nga arma e zjarrit. Vdekjen e tij e ka konfirmuar ekipi mjekësor që doli në vendin e ngjarjes, teksa trupi është tërhequr për t’u dërguar në IML për obduksion.
Salihut i jepet nesër lamtumira e fundit, në varrezat e fshatit, nga ora 15:00, ka njoftuar familja e tij.
Burimet nga Prokuroria kanë bërë me dije se lidhur me këtë rast, Policia ka kryer edhe ekzaminimet e nevojshme, por akoma s’janë gjetur gjurmë që mund të çojnë në identifikimin e të dyshuarve që kryen këtë vrasje.
