Vrasja e 15-vjeçarit dhe babait të tij në Gradicë, ja çfarë u tha dje në seancën e radhës në Gjykatë
Dëshmitari Valmir Muja, në seancën e së mërkurës në Gjykatën Themelore në Prishtinë, ka deklaruar se B.M. ka qenë ushtar dhe prej luftës nuk ka mbajtur armë.
Këtë deklarim, Muja e bëri gjatë dhënies së dëshmisë, në rastin ku Xhafer dhe Amir Bardhi akuzohen se si rezultat i një mosmarrëveshje pronësore, kanë privuar nga jeta të miturin A.M (15-vjeçar) dhe prindin e tij B.M., raporton “Betimi për Drejtësi”.
Në pyetjen e prokurorit Bashkim Zeqaj se çfarë ka ndodhur në ditën kritike, Muja tha se fillimisht ka parë dy drita dhe pas të shtënave të armës ai ka qenë pa ndjenja.
“Kam dëgju krismën e parë dhe të dytën paralel, bam bam dhe pastaj më ka ra të fiktë dhe s’di sen ma”, tha ai.
Tutje prokurori Zeqaj, pyeti dëshmitarin Muja se a ka qenë errësirë në kohën e ngjarjes, ndërkaq dëshmitari Muja është përgjigjur se “u kanë para se me ra terri në tokë”.
Në anën tjetër mbrojtësi i të të akuzuarit Xhafer, avokatit Haxhi Millaku , pyeti dëshmitarin Muja se përveç atyre dy dritave që i ka parë në kohën e ngjarjes a ka pasur edhe drita të tjera, ai tha se nuk ka pasur drita tjera.
Duke u përgjigjur në pyetjet e anëtarit të trupi gjykues, gjykatësit Ngadhnijm Arrni, dëshmitari ka thënë se nuk i kujtohet sa ka qenë periudha kohore prej momentit që ka parë dritat deri kur i ka dëgjuar krismat.
Në pyetjen gjykatësit Agim Kuçi, dëshmitari Muja se nuk i kujtohet sa ka qenë distanca mes dy dritave.
Po ashtu gjykatësit Kuçi, pyeti dëshmitarin Muja se si kanë mundur t’i bartin drutë nëpër terr, i njëjti është përgjigjur me “qashtu qysh kena mujt”.
Tutje, në pyetjen e anëtares së trupit gjykues, gjykatëses Medie Bytyqi se a kanë shfrytëzuar dritat e telefonit, dëshmitari Muja ka thënë se nuk i kujtohet.
Seancat e radhës për këtë çështje pritet të mbahet me 7 shkurt 2023.
Sipas aktakuzës së përpiluar më 28 shkurt 2022, nga Prokuroria Themelore në Prishtinë, të pandehurit Xhafer Bardhi dhe Amir Bardhi po akuzohen se më 5 prill 2021 në vendin e quajtur “Zabel” në pyllin e fshatit Gradicë, për shkak të një mosmarrëveshje pronësore rreth së drejtës së shfrytëzimit të malit, me dashje të pandehurit Bardhi në bashkëkryerje kanë privuar nga jeta të miturin- tani të ndjerin A.M 15-vjeçar dhe prindin e tij B.M.
Aktakuza thotë se të njëjtit kanë vënë në rrezik dhe jetën e personave tjerë, të dëmtuarave Valdrin, Valmir dhe Driton Muja, në atë mënyrë që derisa i pandehuri Amir Bardhi ka qenë duke ecur rrugës së malit bashkë me djalin e axhës së tij, dëshmitarin Fisnik Bardhi, aty takohen me të dëmtuarin Valdrin Muja, i cili ka shkuar nga mali, vendi ku ka qenë duke prerë drunj, për ta marrë traktorin dhe për të ngarkuar drunjtë të cilat kanë qenë duke i prerë në mal.
Më pas, aktakuza thotë se Amiri e ka pyetur Valdrinin se “çka jeni duke bërë” dhe se i njëjti i tregon se janë duke prerë drunj në mal dhe më pas i dëmtuari Valdrin vazhdon rrugën në drejtim të vendit ku kanë qenë duke prerë drunjtë, ndërsa Amiri dhe Fisniku po ashtu ndahen.
Tutje, në aktakuzë thuhet se i pandehuri Amiri nëpërmjet telefonit e njofton të pandehurin Xhafer se të dëmtuarit janë duke prerë drunj në mal të cilët bisedojnë për 62 sekonda.
I pandehuri Xhafer i cili ka qenë në shtëpi, thuhet se i merr dy drita për ndriçim të cilat vendosen në kokë, merr armën-pushkën e gjuetisë dhe niset më veturën e tipit “Golf 2” e rrugës bëhen bashkë të dy të pandehurit dhe vazhdojnë në drejtimi të vendit ku të dëmtuarit kanë qenë duke prerë drunj.
Aty, i pandehuri Amir thuhet se ka kontribuar në kryerjen e veprës penale, duke ndriçuar me njërën dritë për të krijuar mundësinë për gjuajte të pandehurit Xhafer, e po ashtu edhe i pandehuri Xhafer ka ndriçuar me njërën dritë dhe menjëherë ky i fundit ka shtënë me armë në drejtim të të dëmtuarit tani të ndjerit A.M i cili në atë moment bërtet “babë më rroki”.
Pastaj, kur i ndjeri B.M dhe i dëmtuari Valdrin shkojnë në drejtim të A.M për t’i dhënë ndihmë, atëherë thuhet se i pandehuri Xhafer prapë shkrep dhe e qëllon tani të ndjerin B.M në kokë, ku më pas i thotë të pandehurit Amir “ikim bir se u bo m**”.
Aktakuza thotë se në vendin e ngjarjes janë gjetur 16 gëzhoja të vogla me të cilat i kanë rrezikuar edhe të dëmtuarit Valdrin, Valmir dhe Driton Muja, të cilët kanë qenë prezent duke prerë dhe bartur drunj, ku këta dy të fundit janë alivanosur pas dy të shtënave.
Gjithnjë sipas aktakuzës, për të ndjerin A.M në Qendrën e Mjekësisë Familjare në Drenas konstatohet vdekja e tij, ku vdekja e tij është e dhunshme dhe ka ardhur si rrjedhojë e gjakderdhjes masive të brendshme dhe të jashtme si pasojë e veprimit dinamik të predhave të hedhura nga arma e gjuetisë.
Ndërsa, i ndjeri B.M pëson lëndime të rënda trupore ku më 15 prill 2021 ndërron jetë në QKUK edhe ai si pasojë e plagëve vdekjeprurëse.
Me këtë, të pandehurit Bardhi akuzohen se në bashkëkryerje kanë kryer veprën penale “Vrasje e rëndë” nga neni 173, paragrafi 1, pika 1.1, 1.5 dhe 1.11 lidhur me nenin 31 të Kodit Penal të Republikës së Kosovës.
Kurse, sipas dispozitivit të dytë të kësaj akuze, i pandehuri Xhafer në kundërshtim me ligjin e zbatueshëm lidhur me armë të tilla ka pasur në posedim armën-pushkën e gjuetisë të cilën e ka punuar vetë.
E me këtë, i pandehuri Xhafer Bardhi akuzohet edhe për veprën penale “Mbajtja në pronësi, kontroll ose posedim të paautorizuar të armëve” nga neni 366, paragrafi 1 të KPRK-së./BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
