Punëtori rrëzohet nga objekti ku punonte, dërgohet me urgjencë në spital
Edhe pse punëtorët shpeshherë marrin lëndime trupore gjatë kohës që janë duke punuar, kompanitë vendore bëjnë shumë pak për përmirësimin e kushteve të punës. Si pasojë e kësaj janë të shpeshta rastet kur punëtorët kërkojnë ndihmë mjekësore në spital për shkak të lëndimeve të marra, raporton Gazeta Sinjali.
Një rast i rëndë ka ndodhur mbrëmë në një objekt në fshatin Korishë të Prizrenit, ku një punëtor ka rënë nga një lartësi dhe për pasojë ka pësuar frakturë në brinjë. Burimet e Gazetës Sinjali brenda Emergjencës kanë bërë me dije se 62-vjeçari është dërguar në këtë qendër për trajtim mjekësor për shkak të lëndimeve që kishte marrë në vendin e tij të punës.
Si rezultat i denoncimit, në vendin e ngjarjes kanë dalë njësitë policore edhe inspektorët e punës të cilët kanë kryer ekzaminimet e nevojshme.
Me urdhër të Prokurorit të Shtetit rasti është iniciuar si “Asgjësim, dëmtim ose heqje e pajisjeve mbrojtëse dhe rrezikshmërinë e sigurisë në vendin e punës”.
