Gjobë prej 2.000 eurosh për kompaninë ku vdiq 17-vjeçari
Gjysmë viti më parë, një 17 vjeçar vdiq në vendin e tij të punës, punë të cilën po e mbante për ta siguruar jetesën. E për vdekjen e Seldin Aliajt, Inspektorati i Punës i caktoi kompanisë gjobë prej 2000 eurosh.
Sipas Basri Ibrahimit, nga ky institucion, inspektori konstatoi burimin e aksidentit, e vendimi erdhi si rrjedhojë e kësaj.
Ibrahimi thotë se kjo gjobë nuk duhet të vlerësohet si sansksionet penale ku vendimet merren në bazë të pasojës, raporton T7.
Ai shton se Inspektorati i Punës konstaton se cilët kanë qenë shkaktarët e aksidentit.
Mirëpo kjo gjobë prej 2000 eurosh është absurd, sipas Behxhet Shalës nga Këshilli për Mbrojtjen e të Drejtave dhe Lirive të Njeriut.Ai thotë se kanë kërkuar nga Inspektorati që të ndryshohen masat ndaj punëdhënësve.
Mirëpo ky vendim i Inspektoratit të Punës, është vetëm njëra nga procedurat që duhet t’i ndjekin institucionet për këtë rast.
Vdekjen e 17 vjecarit është duke e hetuar edhe Prokuroria Themelore në Prizren, e cila ka marrë aktvendim për fillimin e hetimeve ndaj pronarit dhe kompanisë.
Në një përgjigjie për T7, nga Prokuroria treguan se kompania është duke u hetuar për dyshim të kryerjes së veprës penale.
Prokuroria ka thënë se është në përfundim të fazës së hetimeve.
Seldin Aliaj kishte vdekur në qershor të vitit 2018.
