Mbahet mbledhja e rregullt e Kuvendit të Komunës së Drenasit
Të enjtën është mbajtur mbledhja e rregullt e Kuvendit të Komunës së Drenasit, ku për diskutim ishin tetë (8) pika për rend dite, ndërsa pas propozimeve është shtuar edhe një pika, transmeton Drenica Online.
Në mbledhje morën pjesë: Kryetari i Komunës, Ramiz Lladrovci, Nënkryetari i Komunës, Gani Sylaj, Kryesuesi i Kuvendit të Komunës, Labinot Halilaj që edhe kryesonte takimin e rregullt të legjislativit komunal, anëtarë të Kuvendit, drejtor të drejtorive komunale, përfaqësues të OSBE-së dhe KFOR-it.
Më poshtë ju elaborojmë të gjitha pikat që kanë kaluar pas diskutimeve, ndërsa për më gjerësisht mbledhjen mund t’a dëgjoni edhe përmes kanalit të YouTube që është i publikuar përmes ueb faqes zyrtare të Komunës: https://kk.rks-gov.net/gllogoc/
1. Pika e parë e rendit të ditës, procesverbali i datës 18.06.2018 ka kaluar me disa ndryshime.
2. Raporti financiar janar-qershor 2018, u prezantua para anëtarëve të Kuvendit dhe ata patën mundësinë të diskutojnë gjërësisht për secilën drejtori veç e veç.
3. Ridestinimi i mjeteve për projektet kapitale, eleminimi i qeneve endacak me vlerë prej 10.000 €, rregullimi i vendndaljeve dhe mbulimi i tyre me vlerë 5,414.80 €, rregullimi i parkingjeve me vlerë 1,526.50€, ridestinohen për rregullimin e Tregut të Gjelbër, pas diskutimeve nga ana e anëtarëve të Kuvendit është votuar me shumicë votash.
4. Propozim Vendim për formimin e komisionit të ankesave, i cili do të shqyrtoj ankesat e palëve në procedurë e dhënies së pronës së paluajtshme komunale në shfrytëzim, u formua komisioni me këtë përbërje:
a) Adem Bucolli – nga Legjislativi (Kuvendi),
b) Alban Bujupi – nga Shoqëria Civile (gazetar në Tribuna)
c) Armend Hajdini – nga Ekzekutivi (Komuna).
5. Ridestinimi i mjeteve nga Drejtoria për Planifikim Urban dhe Mbrojtje të Mjedisit, ka kaluar me shumicë votash, pas diskutimeve nga anëtarët e Kuvendit.
6. Memorandum Mirëkuptimi rreth shpalljes së bjeshkëve të Qyqavicës, zonë me interes të përgjithshëm, u cilësua projekt me rëndësi të veçantë dhe u aprovua nga antarët e Kuvendit.
7. Propozim Rregullore për mbrojtjen dhe realizimin e të drejtave të fëmijëve në Komunën e Drenasit, u vlerësua si dokument, u tha se është e rëndësishme dhe e domosdoshme që Komuna e Drenasit të ketë këtë Rregullore dhe pas diskutimeve u aprovua unanimisht.
8. Propozim Vendimin, për shpalljen e interesit të përgjithshëm publik të ngastrave kadastrale, në zonën kadastrale në Verboc sipas studimit të fizibilitetit për parcelat që i përfshinë akumulacioni, pas shumë diskutimesh e propozimesh, ka kaluar me shumicë votash.
9. Ndërsa tek të ndryshmet, antarët e Kuvendit bënë pyetje dhe diskutuan çështje të ndryshme ndërsa Kryetari Lladrovci u përgjigj në secilën pyetje dhe çështje të diskutuar. Në këtë pikë, anëtari i Komisioni për zgjedhjen e Këshillave të Fshatrave, Naim Gjeli, raportoi rreth punës së tyre dhe zgjedhjes së të gjitha Këshillave nëpër të gjitha fshatrat si dhe takimet me ta pas zgjedhjes.
