Policia e Kosovës kërkon ndërtesa të reja për dy stacione në Prishtinë
Sot në ambientet e Policisë së Kosovës (PK), në stacionin policor “Jugu”Prishtinë dhe në shoqatën e grave të Policisë së Kosovës, ishin për vizitë pune delegacioni i Komisionit Parlamentar për Punë të Brendshme, Siguri dhe Mbikëqyrje të FSK-së, njofton kumtesa nga Policia.
Me këtë rast delegacioni vizitoi hapësirat e stacionit policor dhe kushtet e punës që ofron ky stacion, të cilat vlerësohen se nuk janë të mjaftueshme për plotësimin e nevojave të punës së punonjësve policor të stacionit policor “jugu” në Prishtinë.
Policia e Kosovës vite me radhë ka ngritur këtë shqetësim të mungesës së hapësirës dhe kushteve të punës në këtë stacion policor, si dhe për vite me radhë ka bërë planifikime buxhetore për ndërtim të këtij stacioni policor, për të cilin nuk është e definuar çështja e pronësisë ekzistuese nga institucionet kompetente, e as nuk është caktuar ndonjë lokacion adekuat nga Komuna e Prishtinës.
PK ka disa vite që ka adresuar disa kërkesa në Komunën e Prishtinës për të kërkuar caktimin e një hapësire për ndërtim të këtij stacioni policor, por ende nuk ka ndonjë zgjidhje konkrete te një lokacioni adekuat.
Në një gjendje jo të mirë me objekt pune dhe kushte pune, është edhe stacioni policor “Veri” në Prishtinë, i cili po ashtu ka nevojë për një objekt dhe hapësirë pune më të mirë.
